കേരളത്തിന്റെ വികസന ചരിത്രത്തിൽ സമാനതകളില്ലാത്ത ഒരു കുതിച്ചുചാട്ടത്തിനാണ് തിരുവനന്തപുരത്തെ വിഴിഞ്ഞം തീരം സാക്ഷ്യം വഹിച്ചുകൊണ്ടിരിക്കുന്നത്. ദശാബ്ദങ്ങളായുള്ള കാത്തിരിപ്പുകൾക്കും പ്രക്ഷോഭങ്ങൾക്കും നിയമയുദ്ധങ്ങൾക്കും ഒടുവിൽ, വിഴിഞ്ഞം അന്താരാഷ്ട്ര ആഴക്കടൽ ട്രാൻസ്ഷിപ്പ്മെന്റ് തുറമുഖം യാഥാർത്ഥ്യമാവുകയും വാണിജ്യ പ്രവർത്തനം ആരംഭിക്കുകയും ചെയ്തപ്പോൾ അത് ഇന്ത്യൻ സമുദ്രവ്യാപാരത്തിന്റെ തന്നെ ഭൂമിശാസ്ത്രം തിരുത്തിക്കുറിച്ചു. എന്നാൽ, ഏതൊരു വൻകിട അടിസ്ഥാനസൗകര്യ വികസന പദ്ധതിയെയും പോലെ വിഴിഞ്ഞവും വിവാദങ്ങളിൽ നിന്നും പൂർണ്ണമായി മുക്തമല്ല.

തുറമുഖത്തിന്റെ അടുത്ത ഘട്ടങ്ങളായ രണ്ട്, മൂന്ന് ഘട്ടങ്ങളുടെ വികസനത്തിനായി ആഗോള ഭീമന്മാരായ ടെർമിനൽ ഇൻവെസ്റ്റ്‌മെന്റ് ലിമിറ്റഡ് (TIL) പങ്കാളിയാകുന്നതുമായി ബന്ധപ്പെട്ടാണ് പുതിയ ചർച്ചകൾ ഉയരുന്നത്. അദാനി പോർട്ട്സ് തങ്ങളുടെ ഓഹരികൾ ടി.ഐ.എല്ലിന് വിൽക്കുന്നതിനെ ‘വിദേശ അധിനിവേശം’ എന്നും ‘തുറമുഖം കൈമാറൽ’ എന്നും ചിത്രീകരിക്കാൻ ചില കോണുകളിൽ നിന്ന് ശ്രമം നടക്കുന്നുണ്ട്. എന്നാൽ, ആഗോള ഷിപ്പിംഗ് രംഗത്തെ യാഥാർത്ഥ്യങ്ങളും വിഴിഞ്ഞത്തിന്റെ സാമ്പത്തിക ശാസ്ത്രവും പരിശോധിക്കുമ്പോൾ ഈ ആശങ്കകളിൽ എന്തെങ്കിലും അർത്ഥമുണ്ടോ? നമുക്ക് പരിശോധിക്കാം.

ആരാണ് ടെർമിനൽ ഇൻവെസ്റ്റ്‌മെന്റ് ലിമിറ്റഡ് (TIL)?
വിഴിഞ്ഞത്തെ നിക്ഷേപത്തെക്കുറിച്ച് സംസാരിക്കുമ്പോൾ ആദ്യം മനസ്സിലാക്കേണ്ടത് ആരാണ് ഈ ‘ടെർമിനൽ ഇൻവെസ്റ്റ്‌മെന്റ് ലിമിറ്റഡ്’ അഥവാ ടി.ഐ.എൽ എന്നാണ്. സ്വിറ്റ്‌സർലൻഡ് ആസ്ഥാനമായി പ്രവർത്തിക്കുന്ന, ലോകത്തിലെ ഏറ്റവും വലിയ കണ്ടെയ്നർ ഷിപ്പിംഗ് ലൈനായ മെഡിറ്ററേനിയൻ ഷിപ്പിംഗ് കമ്പനി (MSC) യുടെ പോർട്ട് ഓപ്പറേറ്റിംഗ് വിഭാഗമാണ് ടി.ഐ.എൽ. എം.എസ്.സിക്ക് ഇതിൽ 70 ശതമാനം ഭൂരിപക്ഷ ഓഹരി പങ്കാളിത്തമുണ്ട്. ബാക്കി ഓഹരികൾ ആഗോള നിക്ഷേപ സ്ഥാപനങ്ങളായ ജി.ഐ.പി (ബ്ലാക്ക്‌റോക്ക്), സിംഗപ്പൂരിന്റെ സോവറിൻ വെൽത്ത് ഫണ്ടായ ജി.ഐ.സി എന്നിവരുടെ കൈകളിലാണ്.

ലളിതമായി പറഞ്ഞാൽ, ലോകത്തിലെ ഏറ്റവും കൂടുതൽ ചരക്കുകപ്പലുകൾ കൈവശമുള്ള കമ്പനിയുടെ സ്വന്തം തുറമുഖ വികസന വിഭാഗമാണ് ടി.ഐ.എൽ. ലോകമെമ്പാടുമുള്ള 5 ഭൂഖണ്ഡങ്ങളിലായി, മുപ്പതിലധികം രാജ്യങ്ങളിൽ നൂറിലധികം കണ്ടെയ്നർ ടെർമിനലുകളുടെ പങ്കാളിത്തമോ പൂർണ്ണ ചുമതലയോ ഈ ഒരൊറ്റ കമ്പനിക്കുണ്ട്. പ്രതിവർഷം 7 കോടിയിലധികം ടി.ഇ.യു (Twenty-foot Equivalent Unit) കണ്ടെയ്നറുകളാണ് ടി.ഐ.എല്ലിന്റെ ശൃംഖല കൈകാര്യം ചെയ്യുന്നത്.

യൂറോപ്പിലെ ഏറ്റവും വലിയ തുറമുഖങ്ങളായ ആന്റ്‌വെർപ്പ്, റോട്ടർഡാം, മെഡിറ്ററേനിയനിലെ പ്രമുഖ ഹബ്ബായ ജിയോയ ടൗറോ, അമേരിക്കയിലെ ലോംഗ് ബീച്ച്, ന്യൂയോർക്ക്, ഏഷ്യയിലെ സിംഗപ്പൂർ, ബുസാൻ തുടങ്ങിയ ലോകോത്തര തുറമുഖങ്ങളിലെല്ലാം ടി.ഐ.എല്ലിന് ശക്തമായ സാന്നിധ്യമുണ്ട്. ഇത്തരമൊരു ആഗോള ഭീമൻ വിഴിഞ്ഞത്തിലേക്ക് വരുന്നു എന്നത് ഒരു പോരായ്മയല്ല, മറിച്ച് വിഴിഞ്ഞത്തിന് ആഗോള തലത്തിൽ ലഭിക്കുന്ന ഏറ്റവും വലിയ അംഗീകാരമാണ്.

ഇന്ത്യയിലെ മുൻകാല അനുഭവങ്ങൾ: മുന്ദ്രയും എണ്ണൂരും

ടി.ഐ.എൽ ഇന്ത്യയിലേക്ക് ആദ്യമായി വരുന്നത് വിഴിഞ്ഞം വഴിയല്ല. ഇന്ത്യൻ തുറമുഖ വികസനത്തിൽ ദീർഘകാലത്തെ പാരമ്പര്യം അവർക്കുണ്ട്. ഗുജറാത്തിലെ ഇന്ത്യയിലെ ഏറ്റവും വലിയ സ്വകാര്യ തുറമുഖമായ മുന്ദ്രയിലും, തമിഴ്‌നാട്ടിലെ എണ്ണൂർ (കാമരാജർ) തുറമുഖത്തും അദാനി ഗ്രൂപ്പുമായി ചേർന്നുള്ള സംയുക്ത സംരംഭങ്ങൾ (Joint Ventures) ടി.ഐ.എല്ലിനുണ്ട്.

മുന്ദ്ര തുറമുഖത്തിന്റെ അസാധാരണമായ വളർച്ചയ്ക്ക് പിന്നിൽ ഈ പങ്കാളിത്തം വലിയ പങ്കുവഹിച്ചിട്ടുണ്ട്. അദാനി പോർട്ട്സ് അടിസ്ഥാന സൗകര്യങ്ങൾ നിർമ്മിച്ചപ്പോൾ, ടി.ഐ.എല്ലിന്റെ മാതൃകമ്പനിയായ എം.എസ്.സി തങ്ങളുടെ ഭീമൻ കപ്പലുകളെ സ്ഥിരമായി മുന്ദ്രയിലേക്ക് തിരിച്ചുവിട്ടു. ഇത് തുറമുഖത്തിന് കൃത്യമായ ചരക്ക് (Assured Cargo) ഉറപ്പാക്കി. ഈ വിജയകരമായ ബിസിനസ്സ് മോഡലാണ് ഇപ്പോൾ വിഴിഞ്ഞത്തും നടപ്പിലാക്കാൻ പോകുന്നത്.

ലോണിന് പകരം ഒഹരി വിൽപ്പന: തന്ത്രപരമായ സാമ്പത്തിക നീക്കം

വിഴിഞ്ഞത്തിന്റെ രണ്ട്, മൂന്ന് ഘട്ടങ്ങളുടെ വികസനത്തിനായി ബാങ്കുകളിൽ നിന്ന് വൻതോതിൽ വായ്പയെടുക്കുന്നതിന് പകരം, അദാനി പോർട്ട്സ് തങ്ങളുടെ വിഴിഞ്ഞം പ്രൊജക്ടിലെ വലിയൊരു പങ്ക് ഓഹരികൾ ടി.ഐ.എല്ലിന് വിറ്റ് ഏകദേശം 13,000 കോടി രൂപ സമാഹരിക്കാൻ ഒരുങ്ങുന്നു എന്നതാണ് പ്രധാന വിമർശനം. എന്നാൽ കോർപ്പറേറ്റ് ധനതത്വശാസ്ത്രത്തിന്റെ കാഴ്ചപ്പാടിൽ ഇത് വിഴിഞ്ഞത്തിന്റെ വികസനത്തെ മന്ദഗതിയിലാക്കുകയല്ല, മറിച്ച് അവിശ്വസനീയമായ വേഗതയിൽ ത്വരിതപ്പെടുത്തുകയാണ് ചെയ്യുന്നത്. അതിനുള്ള കാരണങ്ങൾ ഇവയാണ്:

1. കടബാധ്യതയില്ലാത്ത വികസനം (Debt-Free Expansion)
   ഒരു പദ്ധതിക്കായി ബാങ്കിൽ നിന്ന് പതിനായിരക്കണക്കിന് കോടി രൂപ വായ്പയെടുക്കുമ്പോൾ, കനത്ത പലിശബാധ്യത പദ്ധതിയുടെ ലാഭക്ഷമതയെ ബാധിക്കും. പലിശ തിരിച്ചടയ്ക്കാനായി തുറമുഖ നിരക്കുകൾ (Tariffs) വർദ്ധിപ്പിക്കേണ്ടി വരും. ഇത് വിഴിഞ്ഞത്തിന്റെ മത്സരക്ഷമതയെ തകർക്കും. എന്നാൽ ഓഹരി പങ്കാളിത്തത്തിലൂടെ പണം കണ്ടെത്തുമ്പോൾ പലിശയുടെ ഭാരമില്ലാതെ വൻതോതിൽ മൂലധനം ലഭ്യമാകുന്നു.
2. ‘കാർഗോ’ ഉറപ്പാക്കൽ (Captive Cargo Guarantee)
   തുറമുഖം പണിതുയർത്തിയാൽ മാത്രം പോരാ, അതിലേക്ക് കപ്പലുകൾ വരണം. ഇന്ന് ലോകത്തിലെ ട്രാൻസ്ഷിപ്പ്മെന്റ് ബിസിനസ്സിന്റെ ഭൂരിഭാഗവും നിയന്ത്രിക്കുന്നത് വിരലിലെണ്ണാവുന്ന ആഗോള ഷിപ്പിംഗ് അലയൻസുകളാണ് (Alliances). ടി.ഐ.എല്ലിന്റെ മാതൃകമ്പനിയായ എം.എസ്.സി (MSC) ആണ് ലോകത്തിലെ ഒന്നാം നമ്പർ കാരിയർ. വിഴിഞ്ഞം ടെർമിനലിൽ ടി.ഐ.എല്ലിന് ഓഹരി പങ്കാളിത്തം ഉണ്ടാകുമ്പോൾ, തങ്ങളുടെ സ്വന്തം ടെർമിനലിന്റെ വിജയം ഉറപ്പാക്കാൻ എം.എസ്.സി തങ്ങളുടെ ഭീമൻ കപ്പലുകളെ സ്ഥിരമായി വിഴിഞ്ഞത്തേക്ക് എത്തിക്കും. അതായത്, തുറമുഖം വികസിക്കുന്നതിനൊപ്പം തന്നെ അതിലേക്ക് ആവശ്യമായ ചരക്കും ഉറപ്പാവുന്നു.
3. അന്താരാഷ്ട്ര ഷിപ്പിംഗ് ലൈനുകളുടെ പ്രവേശനം
   ടി.ഐ.എൽ ടെർമിനലുകൾ ഒരു ‘ക്ലോസ്ഡ് ഷോപ്പ്’ അല്ല. എം.എസ്.സിയുടെ കപ്പലുകൾക്ക് മുൻഗണന ഉണ്ടാകുമെങ്കിലും, ലോകത്തിലെ മറ്റ് പ്രമുഖ ഷിപ്പിംഗ് ലൈനുകളായ സി.എം.എ സി.ജി.എം (CMA CGM), മാേഴ്സ്ക് (Maersk) തുടങ്ങിയ കമ്പനികൾക്കും വിഴിഞ്ഞം തുറമുഖം ഉപയോഗിക്കാൻ പൂർണ്ണ അനുമതിയുണ്ടാകും. ആഗോളതലത്തിൽ ടി.ഐ.എല്ലിനുള്ള വിശ്വാസ്യത മറ്റ് ലൈനുകളെയും ഇങ്ങോട്ട് ആകർഷിക്കും.

വരുമാനത്തിന്റെ കുതിച്ചുചാട്ടം: ജി.എസ്.ടി കണക്കുകൾ വ്യക്തമാക്കുന്നത്

വിഴിഞ്ഞം തുറമുഖത്തിന്റെ സാമ്പത്തിക ശേഷിയെക്കുറിച്ച് സംശയമുള്ളവർക്ക് കൃത്യമായ മറുപടിയാണ് തുറമുഖം വാണിജ്യ പ്രവർത്തനം ആരംഭിച്ച് ആദ്യ മാസങ്ങളിൽ തന്നെ നൽകിയത്. ട്രയൽ റണ്ണിലും ആദ്യ മാസങ്ങളിലും മാത്രമായി 100 കോടിയിലധികം രൂപയാണ് ജി.എസ്.ടി (GST) ഇനത്തിൽ മാത്രം സർക്കാരിലേക്ക് വരുമാനമായി ഒഴുകിയെത്തിയത്. അതും കേവലം ഒരു ബർത്ത് മാത്രം ഭാഗികമായി പ്രവർത്തനസജ്ജമായ ഘട്ടത്തിൽ!

ഭൂമിശാസ്ത്രപരമായി അന്താരാഷ്ട്ര പ്രധാന കപ്പൽചാലിനോട് (International Sea Route) വെറും 10 നോട്ടിക്കൽ മൈൽ മാത്രം അകലെ സ്ഥിതി ചെയ്യുന്ന വിഴിഞ്ഞത്തിന് കൊളംബോ, സിംഗപ്പൂർ, ദുബായ് തുറമുഖങ്ങളോട് നേരിട്ട് മത്സരിക്കാനുള്ള ശേഷിയുണ്ട്. നിലവിൽ ഇന്ത്യയുടെ ട്രാൻസ്ഷിപ്പ്മെന്റ് ചരക്കുകളുടെ വലിയൊരു പങ്ക് കൊളംബോ വഴിയാണ് പോകുന്നത്. വിഴിഞ്ഞം പൂർണ്ണ സജ്ജമാകുന്നതോടെ ഈ ചരക്കുകളെല്ലാം ഇന്ത്യയിലേക്ക് തന്നെ തിരിച്ചെത്തും.
ആദ്യ ഘട്ടത്തിൽ തന്നെ നൂറ് കോടി നികുതി വരുമാനം നൽകിയ തുറമുഖം, രണ്ടും മൂന്നും ഘട്ടങ്ങൾ പൂർത്തിയാക്കി പൂർണ്ണ ശേഷി കൈവരിക്കുമ്പോൾ സംസ്ഥാന-കേന്ദ്ര സർക്കാരുകൾക്ക് നൽകാൻ പോകുന്ന വരുമാനം എത്രയെന്ന് ഊഹിക്കാവുന്നതേയുള്ളൂ.

• തൊഴിലവസരങ്ങൾ: തുറമുഖം വികസിക്കുന്നതോടെ ലോജിസ്റ്റിക്സ് പാർക്കുകൾ, വെയർഹൗസുകൾ, കപ്പൽ അറ്റകുറ്റപ്പണി കേന്ദ്രങ്ങൾ എന്നിവ വഴി പതിനായിരക്കണക്കിന് നേരിട്ടുള്ളതും അല്ലാത്തതുമായ തൊഴിലവസരങ്ങൾ കേരളത്തിലുണ്ടാകും.
• അനുബന്ധ വ്യവസായങ്ങൾ: ഹോട്ടൽ, ഗതാഗതം, ബാങ്കിംഗ്, ടൂറിസം തുടങ്ങിയ മേഖലകളിലെല്ലാം വലിയ ഉണർവ്വുണ്ടാകും.

ഭയമല്ല, യാഥാർത്ഥ്യബോധമാണ് ആവശ്യം;

നൂറിലധികം അന്താരാഷ്ട്ര ടെർമിനലുകൾ കൈകാര്യം ചെയ്യുന്ന ടി.ഐ.എല്ലിന്റെ സാങ്കേതിക തികവും സാമ്പത്തിക ശേഷിയും, ലോകത്തെ ഏറ്റവും വലിയ ഷിപ്പിംഗ് ലൈനായ എം.എസ്.സിയുടെ കപ്പലുകളും വിഴിഞ്ഞത്തേക്ക് എത്തുന്നതോടെ വിഴിഞ്ഞം ലോക ഭൂപടത്തിലെ ഏറ്റവും തിരക്കേറിയ സമുദ്ര ഹബ്ബുകളിലൊന്നായി മാറും. കൂടുതൽ വികസനം എന്നാൽ കൂടുതൽ കപ്പലുകൾ, കൂടുതൽ ചരക്ക്, കൂടുതൽ തൊഴിൽ, ഒടുവിൽ കൂടുതൽ വരുമാനം എന്നാണ് അർത്ഥം. അതുകൊണ്ട് തന്നെ, വിഴിഞ്ഞത്തെ അന്താരാഷ്ട്ര നിക്ഷേപങ്ങളെക്കുറിച്ചുള്ള ആശങ്കകളിൽ യാതൊരു അർത്ഥവുമില്ലെന്ന് മാത്രമല്ല, അത് നാളെയുടെ കേരളത്തിന്റെ സാമ്പത്തിക സ്വാതന്ത്ര്യത്തിലേക്കുള്ള ചുവടുവെപ്പാണ്.

എങ്കിലും, ഈ വികസന കുതിപ്പുകൾക്കിടയിലും അതീവ ജാഗ്രത പുലർത്തേണ്ട ഒരു പ്രധാന വശമുണ്ട്. വിഴിഞ്ഞം തുറമുഖത്തിന്റെ പരമാധികാരവും ഉടമസ്ഥാവകാശവും എപ്പോഴും വിഴിഞ്ഞം ഇന്റർനാഷണൽ സീപോർട്ട് ലിമിറ്റഡ് (VISL) വഴി കേരള സർക്കാരിൽത്തന്നെയാണ് നിക്ഷിപ്തമായിരിക്കുന്നത്. കരാർ പ്രകാരം നിശ്ചിത വർഷങ്ങൾ കഴിയുമ്പോൾ തുറമുഖത്തുനിന്നുള്ള വരുമാനത്തിന്റെ കൃത്യമായ വിഹിതം കേരള സർക്കാരിലേക്ക് കണ്ടുതുടങ്ങേണ്ടതുണ്ട്. 40 വർഷത്തെ പ്രവർത്തന കാലാവധിക്ക് ശേഷം ഈ ആസ്തികൾ പൂർണ്ണമായും സംസ്ഥാനത്തിന് സ്വന്തമാകേണ്ടതുമാണ്.
അതുകൊണ്ടുതന്നെ, ടി.ഐ.എല്ലുമായോ (TIL) എം.എസ്.സിയുമായോ (MSC) ഉണ്ടാക്കുന്ന പുതിയ പങ്കാളിത്ത കരാറുകൾ ഒരു കാരണവശാലും കേരളത്തിന്റെ ദീർഘകാല താൽപ്പര്യങ്ങളെയോ ഭാവിക്കാല വരുമാന വിഹിതത്തെയോ ഹനിക്കുന്ന തരത്തിലാകരുത് എന്ന് ഉറപ്പുവരുത്തേണ്ടത് നിലവിലെ സർക്കാരിന്റെ വലിയ ഉത്തരവാദിത്വമാണ്. അന്താരാഷ്ട്ര കമ്പനികളുടെ സാന്നിധ്യം പദ്ധതിക്ക് കരുത്തുപകരുമ്പോൾ തന്നെ, സംസ്ഥാനത്തിന് അവകാശപ്പെട്ട ആനുകൂല്യങ്ങളും നിയന്ത്രണങ്ങളും ഒരു വിട്ടുവീഴ്ചയുമില്ലാതെ സംരക്ഷിക്കപ്പെടുന്നുണ്ടെന്ന് ഉറപ്പാക്കാൻ സർക്കാർ പ്രതിജ്ഞാബദ്ധമാകണം. എങ്കിൽ മാത്രമേ വിഴിഞ്ഞം എന്ന സ്വപ്ന പദ്ധതി പൂർണ്ണ അർത്ഥത്തിൽ കേരളത്തിന്റെ സ്വന്തം വിജയഗാഥയായി മാറുകയുള്ളൂ.

പ്രിൻസാദ് പാറായി: മിഡിൽ ഈസ്റ്റിലെ മുൻനിര കമ്പനികളിലൊന്നിൽ ‘ലോജിസ്റ്റിക്സ് അനലിസ്റ്റ്’ (Logistics Analyst) ആയി സേവനമനുഷ്ഠിക്കുന്നു. അന്താരാഷ്ട്ര സമുദ്രവ്യാപാരം, സപ്ലൈ ചെയിൻ മാനേജ്‌മെന്റ്, ഗതാഗത മേഖലകൾ എന്നിവയിൽ രണ്ട് പതിറ്റാണ്ടായി പ്രവർത്തിച്ചു വരുന്നു.

The post വിഴിഞ്ഞത്തെ വിദേശ നിക്ഷേപം: യാഥാർത്ഥ്യങ്ങളും ആശങ്കകളും appeared first on OPEN PRESS | ഓപ്പണ്‍ പ്രസ്സ്.

രണ്ട് പ്രധാന മാറ്റങ്ങളാണ് ഉള്ളത്;

1. വിവിധ ബോർഡുകളിൽ ഹയർസെക്കണ്ടറി മാർക്കുകൾ സമീകരിക്കുന്നത് എങ്ങിനെയാണ്?

എല്ലാ ബോർഡിലെയും ടോപ്പറുടെ മാർക്ക് പരിഗണിച്ച് അതിലോട്ട് കിട്ടിയ മാർക്കിനെ normalize ചെയ്യുന്ന രീതിയാണ് സ്വീകരിച്ചിട്ടുള്ളത്. ഉദാഹരണത്തിന് കണക്കിൽ CBSE ബോർഡിൽ പഠിക്കുന്ന ടോപ്പറുടെ മാർക്ക് 100ൽ 95 ആണെന്ന് കരുതുക. ഈ 95നെ 100 ആയി പരിഗണിച്ച് normalize ചെയ്യും. അതായത് മറ്റൊരാൾക്ക് 90 മാർക്ക് കിട്ടിയാൽ. normalized score (90/95)*100 അഥവാ 94.7 ആയിരിക്കും.

ഒറ്റനോട്ടത്തിൽ നല്ലതാണെന്ന് തോന്നാം, പക്ഷെ ഒട്ടും യുക്തിയില്ലാത്ത ഒരു method ആണിത്. കാരണം ലക്ഷക്കണക്കിന് ആളുകൾ എഴുതുന്ന ബോർഡിൽ ഇപ്പോഴും statistical outlier ആയി ഒരു മുഴുവൻ മാർക്ക് മേടിച്ച ടോപ്പർ ഉണ്ടാകും. അതായത് 100ൽ 100 മാർക്കുള്ള ഒരാൾ ഉണ്ടാകും എന്നാണു സാമാന്യ യുക്തി പറയുന്നത്. അത് കൊണ്ട് ഇനി മുതൽ നോർമലൈസേഷൻ ഇല്ല എന്ന് തന്നെ വെക്കാം.

2. ഓരോ വിഷയത്തിനുമുള്ള weightage മാറ്റി- Maths, Physics, Chemistry എന്നിവയുടെ weightage 1:1:1 അനുപാതത്തിൽ നിന്ന് 5:3:2 അനുപാതത്തിലോട്ട് മാറ്റി. അതായത് maths നും physics നാണു കൂടുതൽ പരിഗണന. ഇത് എന്റെ അഭിപ്രായത്തിൽ നല്ലൊരു മാറ്റമാണ്.

രസകരമായ കാര്യം കഴിഞ്ഞ തവണ ഗവൺമെന്റ് നിയോഗിച്ച – IIT, CUSAT professors അടങ്ങിയ expert committee നിർദേശിച്ച നാല് ഫോർമുലകൾ ഉണ്ട്. അതിൽ ഒന്നും സർക്കാർ സ്വീകരിച്ചില്ല എന്നതാണ്. പകരം, എല്ലാ നിലക്കും യുക്തിരഹിതമായ ഒരു സമീകരണ ഫോർമുലയാണ് മുന്നോട്ട് വെച്ചിട്ടുള്ളത്. ഇനി ബോർഡുകൾ തമ്മിൽ മാർക്ക് സമീകരണം ഇല്ല എന്ന് തന്നെ പറയാം. ആരുടെ കണ്ടുപിടുത്തമാണിതെന്ന് ദൈവത്തിനറിയാം!

KEAM പരീക്ഷ തന്നെ എടുത്തു കളയണം എന്നാണ് എന്റെ അഭിപ്രായം. JEE ക്കും KEAM നും പഠിക്കുക എന്നത് കുട്ടികളെ സംബന്ധിച്ചിടത്തോളം ബുദ്ധിമുട്ടാണ്- പകരം JEE റാങ്ക്ലിസ്റ് സംസഥാന തലത്തിലും ഉപയോഗിക്കാം. കോച്ചിങ് എല്ലാവര്ക്കും accessible അല്ല എന്നതാണ് പ്രശ്നമെങ്കിൽ +2 മാർക്കിന് ഇപ്പോഴത്തെ പോലെ weightage നൽകാം. KEAM നായാലും കോച്ചിങ് വേണമല്ലോ. രണ്ടു കോച്ചിങ്ങിനെക്കാളും കുട്ടികൾക്ക് നല്ലത് ഒരൊറ്റ പരീക്ഷക്കുള്ള കോച്ചിങ് ആണ്.

After effect : 7 ആം ക്ലാസ് മുതൽ cbse/ഇതര ബോർഡുകളിൽ നിന്ന് state സിലബസിലേക്ക് കുട്ടികൾ വീണ്ടും ഒഴുകി തുടങ്ങും. പൊതു വിദ്യാഭ്യാസം ശക്തിപ്പെടുന്നതിന്റെ സൂചനയായി കണക്കുകൾ അവതരിപ്പിച്ച് സർക്കാറിന് ആത്മഹർഷം കൊള്ളാം.

Mohammed Ajmal.c

The post KEAM 2026 : പുതിയ സമീകരണ ഫോർമുല നിലവിൽ വന്നു appeared first on OPEN PRESS | ഓപ്പണ്‍ പ്രസ്സ്.

കുട്ടികൾ കളിച്ചു നടക്കേണ്ട കാലത്ത് അതിനു സ്‌പേസ് വേണം. കാരണം ഏറ്റവും കൂടുതൽ സാമൂഹികവൽക്കരണം അവിടെയാണ്.

ഇന്ന് ടീൻ ഏജ്‌ ആയ ഓരോ കുട്ടികളും കരിയർ anxious ആണ്.

എങ്ങനെ കരിയർ ശരിയാക്കാം, എന്ത് കരിയർ അങ്ങനെ… പിന്നെ ഡോക്ടർ, എഞ്ചിനിയർ ഒക്കെയാക്കാൻ ഹൈ പ്രെഷർ എൻട്രൻസ് കോച്ചിങ്. പലപ്പോഴും 11-12 നൊപ്പം. അഥവാ മെഡിസിൻ കിട്ടിയാൽ പിന്നെ പി ജി അഡ്മിഷൻ കിട്ടാനുള്ള പ്രെഷർ.

ജോലി കിട്ടിയാൽ ജോലിയിൽ എങ്ങനെ വിജയിക്കാമെന്ന പ്രെഷർ. എത്രയും കൂടുതൽ സാലറിക്ക് വേണ്ടി ജോബ് ഷിഫ്റ്റിന് വേണ്ടിയുള്ള പ്രെഷർ. പിന്നെ എല്ലാവരെയും പോലെ വല്യ വീടും വല്യ കാറിനുമുള്ള പീർ പ്രഷർ.

അത് കഴിഞ്ഞു EMI പ്രെഷർ.

ഇങ്ങനെ അമ്പത് വയസ്സ് ആകുന്നതിന് മുമ്പേ ഹൈപ്പർ ടെൻഷൻ.

കരിയർ ഒക്കെ വിജയിപ്പിച്ചു വിജയശ്രീലാളിതരാക്കുമ്പോൾ കുടുംബം ഒരു വഴിക്കാകും. ഡിവോഴ്സ് കൂടും. ഫെർട്ടിലിട്ടി കുറയും, കുട്ടികൾ കുറയും.

ഉള്ള കുട്ടികൾക്ക് ഈ പ്രെഷർ കുക്കർ സാഹചര്യത്തിൽ എങ്ങനെയും അവരുടെ കരിയർ വിജയിപ്പിക്കാൻ നോക്കും

കേരളം വിട്ട് പോയാലും ഈ ഹൈപ്പർ കരിയർ സിനഡ്രോമും അതിന്റെ ഡ്രൈവിംഗ് ഫോഴ്‌സായ പണമോഹവും കുറയില്ല

ജീവിത ലക്ഷ്യം = കരിയർ സക്സ്സസ് = കൂടുതൽ പണം = സോഷ്യൽ സ്റ്റാറ്റസ് എന്ന സമവാക്യത്തിനു പുറത്തായാൽ അത് സോഷ്യൽ അനോമലിയാകുമെന്ന അവസ്ഥയായിലാണ് കാര്യങ്ങൾ. എന്തിനും ഏതിനും കടുത്ത മത്സര പരീക്ഷയാകുന്ന ജീവിതത്തിൽ വിജയവും പരാജയവും സാമൂഹിക ധാരണ നിർമ്മിതികളാണ്.

സ്കൂളിൽ തൊട്ട് മത്സര പരീക്ഷയിൽ കൂടുതൽ മാർക്ക് വാങ്ങിക്കുന്നവർ മിടുക്കൻമാരും അല്ലാത്തവർ മണ്ടൻമാരുമാകുന്ന സാമൂഹിക മനസ്ഥിതികൾ. കരിയർ സക്സ്സും കാശും ഉള്ളവർ മിടുക്കൻമാരും അതില്ലാത്തവർ മണ്ടൻമാർ എന്ന സാമൂഹിക ധാരണ.

ഹൈഡപ്പർ കരിയർ സിനഡ്രോം എന്നത് ജീവിതം തന്നെ ഒരു ഓട്ട മത്സരമായി കാണുന്ന അവസ്ഥയാണ്. ഓട്ട മത്സരത്തിൽ സ്ഥാനമാന മോഹങ്ങൾ എല്ലാം ലഭിച്ചാൽ ഞാൻ മിടുക്കനാണ് എന്ന് അറിഞ്ഞും അറിയാതെയുമുള്ള തോന്നൽ.

രാഷ്ട്രീയത്തിലും ഹൈപ്പാർ കരിയർ സിനഡ്രോം കൂടുന്നുണ്ട്. രാഷ്ട്രീയ മൂല്യങ്ങളെക്കാൾ എങ്ങനെയെങ്കിലും എന്ത് വിധേനയും അധികാരത്തിൽ എത്തുക എന്നരൊറ്റ കരിയർ മോട്ടിവേഷൻ മാത്രമായി.

അധികാരം കിട്ടിയാൽ പിന്നെ give more ഓട്ടപാച്ചിൽ. കിട്ടിയത് പോര പോര എന്ന ഒരിക്കലും ശമിക്കാത്ത ദാഹം. ഐ, മി, മൈൻ സിനഡ്രോം.

ഒരിക്കലും യൂണിഫോം ഇടാതെ നാട്ടിൽ കുറ്റിയും കൊന്ദും കളിച്ചു, തോട്ടിൽ മീൻ പിടിച്ചു കുളത്തിൽ നീന്തി വെറുതെ സുഖമായി പഠിച്ചു കരിയർ എന്നാൽ ചുക്കോ ചുണ്ണാമ്പോ എന്നു നോക്കാതെ ഒരു പ്രഷറും ഇല്ലാതെ സാധാരണ സർക്കാർ സ്കൂൾ കോളേജിൽ പഠിച്ചു പല വഴിക്ക് പോയ ഒരു കാർഷിക തലമുറയിൽ പെട്ടവരുടെ ഒരു നല്ല കാര്യം കരിയർ പ്രെഷർ ഇല്ലായിരുന്നു എന്നതാണ്. അന്നത്തെ രാഷ്ട്രീയക്കാര് പോലും കരിയർ സിനഡ്രോം കുറവായിരുന്നു

ഇന്ന് കരിയർ മാത്രമാണ് ജീവിതം എന്ന് കരുതുന്നവരുടെ എണ്ണം കൂടുന്നു. കരിയർ സക്സ്സസ് ഒരു സാമൂഹിക വാലിഡേഷനായി. രാഷ്ട്രീയത്തിൽ പോലും സൈഡ് ലൈൻ ചെയ്യപ്പെട്ടാൽ അയാൾ പരാജിതനാണ് എന്ന സാമൂഹിക മനസ്ഥിതി കൂടുന്നു. അങ്ങനെ അടിമുടി കരിയർ സിനഡ്രോം ബാധിച്ച രോഗതുരമായ സമൂഹമായി കൊണ്ടിരിക്കുന്നു.

ഈ പ്രശ്നങ്ങൾ ഒന്നും മോട്ടിവെഷൻ ക്ലാസ് കൊണ്ടു മാറില്ല.

Js Adoor

The post കരിയർ സിനഡ്രോം; എന്തിനും ഏതിനും കടുത്ത മത്സര പരീക്ഷയാകുന്ന ജീവിതങ്ങൾ appeared first on OPEN PRESS | ഓപ്പണ്‍ പ്രസ്സ്.

ലക്ഷ്മി മേനോൻ / സരിത നായർ, മോൻസൻ മാവുങ്കൽ, സ്വപ്ന, ടോട്ടൽ ഫോർ യു, അനന്തകൃഷ്ണൻ, പോപ്പുലർ, നെടുമ്പ്രം സഹകരണ ബാങ്ക്‌ തട്ടിപ്പ് തരികിട…..

കേരളത്തിൽ രണ്ടു മാസത്തിൽ ഒരു തട്ടിപ്പ് വന്നാലും വീണ്ടും അതിൽ പോയി തല വച്ചു കൊടുക്കും.

എന്താണ് കേരളത്തിൽ ഇത് നടക്കുന്നത്?

കേരളത്തിൽ ആസ്പിറേഷൻ കൂടുതലും സാമ്പത്തിക കപ്പാസിറ്റി കുറവുമായ ഒരു കൺസ്യൂമർ സമൂഹമാണ്‌.

ഒരു കൺസ്യമർ സ്റ്റാറ്റസ് കോ സമൂഹത്തിൽ കുളിച്ചില്ലെങ്കിലും കോണകം പുരപ്പുറത്തു കിടക്കണം എന്ന സമീപനം കൂടി കൂടി വരുന്നു.

പലപ്പോഴും സാധാരണക്കാരൻ 36% – 40% കൊള്ളപ്പലിശക്ക് മൈക്രോ ഫിനാൻസിൽ നിന്ന് കടം എടുക്കുന്നത് എന്തെങ്കിലും കൺസ്യൂമർ ഗുഡോ, ബൈക്ക് വാങ്ങാനോ അല്ലെങ്കിൽ വില കൂടിയ ഫോൺ വാങ്ങാനോയാണ്.

കേരളത്തിൽ മിക്കവാറും ലോട്ടറി എടുക്കുന്നത് ശരാശരി മാസം ഇരുപതിനായിരം രൂപയിൽ താഴെ വരുമാനമുള്ളവരാണ്. എല്ലാ മാസവും ശരാശരി 500 രൂപയോ 1000 രൂപയോ ചിലവാക്കി ലോട്ടറി എടുത്തു വലിയ സ്വപ്നം കാണുന്ന ലോട്ടറി അഡിക്റ്റുകളെ എനിക്ക് നേരിട്ട് അറിയാം.

സത്യത്തിൽ സർക്കാർ പാവങ്ങൾക്ക് സ്വപ്നം വിറ്റ് കാശ് അടിക്കുന്ന സംഘടിത തട്ടിപ്പാണ് ലോട്ടറി.

ഇങ്ങനെയുള്ള വലിയ സ്റ്റാറ്റസ് കോ അസ്പയറിങ്‌ സമൂഹത്തിൽ ചെറുപ്പക്കാർ നേരിടുന്ന ഏറ്റവും വലിയ പ്രശ്നം ബർഡൻ ഓഫ് എക്സ്പെക്സ്റ്റേഷനാണ്. അത് വീട്ടുകാരിൽ നിന്നും എക്സ്റ്റണ്ടട് ഫാമിലിയിൽ നിന്നും പിയർ പ്രെഷറിൽ നിന്നും ഭയങ്കരമാണ്‌. എങ്ങനെയെങ്കിലും സക്സ്സ് ആകുക എന്ന ക്രേസ്.

ലോവർ മിഡിൽ ക്‌ളാസിന് അപ്പർ മിഡിൽ ക്ലാസ് സ്വപ്നങ്ങൾ, അപ്പർ മിഡിൽ ക്ലാസ്സിനു കോടിപതി സ്വപ്നങ്ങൾ. പാവപെട്ടവർക്ക് ലോവർ മിഡിൽ ക്ലാസ് സ്വപ്നങ്ങൾ.

ഇന്ന് ഈ ബർഡൻ ഏറ്റവും കൂടുതൽ അനുഭവവിക്കുന്നത് ചെറുപ്പക്കാരാണ്. കേരളത്തിൽ ഏറ്റവും കൂടുതൽ ഉള്ളത് depravation inequality mindset ആണ്.

മറ്റുള്ളവരുമായി നിരന്തരം താരതമ്യം ചെയ്തു ഹം കിസി സേ കം നഹി എന്ന മനസ്ഥിതി.

മക്കളുടെ കല്യാണം വൻ നിലയിൽ കടം എടുത്തു പത്തും ഇരുപതും ലക്ഷം മുടക്കി നടത്തി 25 ലക്ഷം കടം അമ്പത് ലക്ഷംമായി വീട് ജപ്തി വന്ന കേസുകൾ അറിയാം. പലപ്പോഴും ഇങ്ങനെയുള്ള സമൂഹത്തിൽ മറ്റുള്ളവരെ കാണിക്കാനാണ് വീട് പണിയുന്നത് മറ്റുള്ളവരെ കാണിക്കാനാണ് വണ്ടി വാങ്ങുന്നത്. മറ്റുള്ളവരെ കാണിക്കാനാണ് കല്യാണത്തിന് ദശ ലക്ഷങ്ങൾ ചിലവാക്കുന്നത്. മറ്റുള്ളവരെ കാണിക്കാനാണ് വീട് പണയം വച്ചു ഏതെങ്കിലും ഏജൻസി വഴി കുട്ടികളെ വെളിയിൽ വിടുന്നത്.

പലപ്പോഴും ഇങ്ങനെ കടം കയറി വിഷമത്തിൽ ആകുമ്പോൾ ചിലർ ആത്മീയ വഴിക്ക് പോകും നേർച്ച കാഴ്ച്ചകൾ അല്ലെങ്കിൽ പ്രവാചകർ. അല്ലെങ്കിൽ കൃപസനം. അല്ലെങ്കിൽ പോയി ബിവറേജസ്സിൽ പോയി ഒരു ക്വാർറ്റർ അടിക്കും. അല്ലങ്കിൽ അടുത്ത ബാറിൽ പോയി രണ്ടു നില്പൻ അടിച്ചു ഇതൊക്കെ മറക്കാൻ നോക്കും.

കേരളത്തിൽ ഇന്ന് പല ചെറുപ്പക്കാരെയും അവർക്ക് ഇഷ്ട്ടമുണ്ടോ ഇല്ലയോ എന്ന് നോക്കാതെ എഞ്ചിനിയറിങ്ങിനു വിടും. അവർ സപ്പ്ളി കൂടി കൂടി എങ്ങും എത്താതെ ലൂസർ മൈൻഡ് സെറ്റിൽ അത് മറക്കാൻ ആദ്യം കഞ്ചാവിൽ തുടങ്ങി പിന്നെ അത് പോരാഞ്ഞിട്ട് ലഹരിയിൽ പോകും.

അവസാനം ഈ ബർഡൻ ഓഫ് എക്സ്പെക്റ്റെഷൻ വയലന്റാകും. ലൂസർ ആകുന്നവർ പലപ്പോഴും ഒന്നുകിൽ സ്വയം പീഡിപ്പിക്കും അല്ലെങ്കിൽ കലിപ്പ് എവിടെയെങ്കിലും തീർക്കും. മക്കൾ അപ്പനെയൊ അമ്മയേയെ കൊല്ലുന്ന കലികാലത്തിലാണ്.

പലരും നാട് വിടുന്നത് ഈ ബർഡൻ ഓഫ് സ്‌പെക്റ്റേഷനിൽ നിന്നും അത് നടക്കാതെ വരുമ്പോൾ തോന്നുന്നു ആത്മഹത്യയിൽ നിന്നും കൊലപാതക ത്വരയിൽ നിന്നും ലഹരി മരുന്നിൽ നിന്നും രക്ഷപെട്ട അനോനിമിറ്റിക്കാണ്.

ഇന്ന് ഏറ്റവും കൂടുതൽ വീട് പണയം വച്ചും വസ്തു വിറ്റും മക്കളെ ഏതെങ്കിലും സാന്റമോനിക്കയൊ അല്ലെങ്കിൽ ഇന്ന് മുക്കിനു മുക്കിനുള്ള ഏജൻസി വഴിയോ പലരും പിള്ളേരെ വിടുന്നത് പല കാരണം കൊണ്ടാണ്.

അതിൽ ഒന്ന് ഭയമാണ്. എങ്ങനെയെങ്കിലും വെളിയിൽ പോയി മണിക്കൂർ കണക്കിന് ഓൾഡ് ഏജ്‌ ഹോമിലോ റെസ്റ്റോറൻറ്റിലോ പണി എടുത്താലും വേണ്ടില്ല. ഇവിടെ തെക്ക് വടക്ക് നടന്നു കള്ളും കഞ്ചാവ്, ലഹരിയിൽ പെടില്ല എന്ന ആശ്വാസം. അങ്ങനെ തങ്ങളെ ഉപദ്രവിക്കില്ല എന്ന ആശ്വാസം.

മറ്റ് ചിലർ വിടുന്നത് പീർ പ്രെഷർ കൊണ്ടാണ്. അയിലത്തെ ചെറുക്കൻ കാനഡയിൽ പോയി നമ്മുടെ പയ്യനെ യൂ കെ ക്കു വിട്ടു. മോൾക് ഇവിടെ അഡ്മിഷൻ പ്രയാസം അപ്പോൾ ഏജൻസി പറഞ്ഞു സ്കോളർഷിപ്പ് ഉൾപ്പെടെ വെറും ഇരുപത് ലക്ഷം ഉണ്ടെങ്കിൽ വെളിയിൽ പോകാം. പിന്നെ സ്റ്റേ ബാക്ക്. നല്ല ജോലി. പി ആർ.

നമ്മുടെ ഭാഗ്യക്കുറി സ്വപ്നം പോലെ ചിലർക്ക് ഭാഗ്യകുറി അടിച്ചാൽ പിന്നെ അത് പരസ്യം ചെയ്തു പിള്ളേരെ പിടിക്കും. മക്കൾ വിദേശത്ത് പഠിക്കുന്നു എന്നതും സ്റ്റാറ്റസ് സിമ്പൽ.

പീർ പ്രെഷർ കൊണ്ടു അമ്പതിനായിരം രൂപയുടെ ഫോൺ വാങ്ങി കടം വീട്ടാൻ ക്വട്ടേഷൻ ഗാംഗിൽ എത്തിചേരുന്ന പിള്ളേരുണ്ട്.

അത് പോലെ ആരെയെങ്കിലും കളിപ്പിച്ചോ അല്ലെങ്കിൽ തരികിട കാണിച്ചോ ഒരുത്തൻ വലിയ കാറിൽ ഇറങ്ങി അല്പം ഇംഗ്ലീഷ് കാച്ചി വന്നാൽ നമ്മുടെ പല രാഷ്ട്രീയക്കാരും വീഴും. ഏത് ചെകുത്താനും വലിയ കാറിൽ വന്നു അഞ്ചു ലക്ഷം പത്തു ലക്ഷം സംഭാവന തന്നാൽ പലരും വീഴും.

ഉടുതുണിക്ക് മറുതുണയല്ലാതെ പണ്ട് തെങ്ങിൽ കയറി തേങ്ങ മോട്ടിച്ച ഒരാൾ ഗൾഫിൽ പോയി അല്പം തരികിട നടത്തി ‘ ബിസിനസ്സ് ‘ കാരനായി. അമ്പത് അറുപതു ലക്ഷത്തിന്റെ വണ്ടി കടം വാങ്ങി പിന്നെ നാട്ടിൽ ഉള്ള സെലിബ്രിറ്റിയുടെയും രാഷ്ട്രീയ നേതാക്കളുടെ കൂടെ സെൽഫി. അങ്ങനെ അമ്പത് ലക്ഷത്തിന്റെ ആസ്തി ഇല്ലാത്തവൻ എവിടെ നിന്നെങ്കിലും ഒരു പഴയ ബെൻസ് എടുത്തു കോടീശ്വരൻ ചമയുന്ന നാടാണ്. അവസാനം അതൊക്കെ വച്ചു കോടിക്കണക്കിന് കടം എടുത്തു മുങ്ങും.

കാശ് ഉള്ളവരെ രാഷ്ട്രീയ നേതാക്കർക്ക് പാർട്ടി ഭേദമന്യേ ഇഷ്ട്ടം. അങ്ങനെ അവരിൽ പലരുടെയും കൂടെ സെൽഫി എടുത്തു വലിയ സ്വാധീനമുള്ളവർ എന്ന് നടിക്കും

കേരളത്തിൽ മോൻസൻ മാവുങ്കലും ലക്ഷ്മി മേനോൻ / സരിത നായർ, സ്വപ്ന, അനന്ത കൃഷ്ണൻ, ടോട്ടൽ ഫോർ യൂ ഇതെല്ലാം നടക്കുന്നത് നമ്മുടെത് ഒരു രോഗാതുരമായ സമൂഹമാണ് എന്നത് കൊണ്ടാണ്. ലോവർ മിഡിൽ ക്ലാസ് അസ്പൈരിങ്‌ സമൂഹം.

Js Adoor

The post നിരന്തരം തട്ടിപ്പിനിരയാവുന്ന പ്രബുദ്ധ കേരളം appeared first on OPEN PRESS | ഓപ്പണ്‍ പ്രസ്സ്.

ഇങ്ങിനെ ചോദിച്ചാൽ, ചാറ്റ് ജിപിറ്റി നമുക്ക് തരുന്ന ഇമേജ് ഒരു ക്ലോക്കിന്റെ തന്നെ ആയിരിക്കും, പക്ഷെ കാണിക്കുന്ന സമയം 10:10 ആയിരിക്കും.

ഇത്രക്ക് ബുദ്ധിയുള്ള ചാറ്റ് ജിപിറ്റിക്ക് തെറ്റ് പറ്റുമോ എന്ന് ചോദിച്ചാൽ പറ്റുമെന്നാണ് ഉത്തരം. കാരണം ചാറ്റ് ജിപിറ്റി പ്രവർത്തിക്കുന്നത്, ലോകത്ത് ഇപ്പോൾ ലഭ്യമായ വിവരങ്ങൾ ഉപയോഗിച്ചാണ്.

പണ്ടുള്ള വാച്ച് നിർമാതാക്കൾ, തങ്ങളുടെ ലോഗോ ഒക്കെ ശരിക്ക് കാണാൻ പറ്റിയ വിധത്തിലുള്ള സമയമായി തിരഞ്ഞെടുത്ത സമയമാണ് പത്ത് മണി കഴിഞ്ഞു പത്ത് മിനിട്ടുള്ള ക്ലോക്ക്. സൂചികൾ ഇടതും വലതുമായി നില്കുന്നത് കൊണ്ട് ലോഗോ നന്നായി കാണാൻ പറ്റും, പലർക്കും ഇത് വളരെ ഭംഗിയായി തോന്നുകയും ചെയ്യും. അതുകൊണ്ട് ഇപ്പോൾ ക്ലോക്കിന്റെ ലഭ്യമായ ഭൂരിപക്ഷം ചിത്രങ്ങളും ഫോട്ടോകളും കാണിക്കുന്നത് 10:10.

ആയതുകൊണ്ട്, നമ്മുടെ ചോദ്യത്തിന്റെ ഉത്തരത്തിന് ഏറ്റവും അടുത്തുള്ള ഇമേജ് ആയ ഒന്നാണ് ചാറ്റ് ജിപിറ്റി കാണിക്കുക, 10:10 കാണിക്കുന്ന ഒരു ക്ലോക്കിന്റെ ചിത്രം.

ഇതേ പോലെ തന്നെ ഒരു പ്രശ്നമാണ് ഇടതു കൈകൊണ്ട് എഴുതുന്ന ഒരാളുടെ ഇമേജ് ഉണ്ടാക്കാൻ പറഞ്ഞാലും സംഭവിക്കുന്നത് (prompt : generate image of a left handed person writing a letter). ചാറ്റ് ജിപിറ്റി തരുന്നത് വലതുകൈ കൊണ്ട് എഴുതുന്ന ഒരാളുടെ ചിത്രമായിരിക്കും. കാരണം ലോകത്ത് ഏറ്റവും കൂടുതലുള്ളത് വലതുകൈ കൊണ്ടെഴുതുന്ന ആളുകളുടെ ചിത്രമാണ്.

കംപ്യൂട്ടറിനു വരെ തെറ്റ് പറ്റാമെങ്കിൽ നമ്മൾ മനുഷ്യരുടെ കാര്യമാലോചിച്ചു നോക്കൂ.

ആയിരക്കണക്കിന് വാർത്താ ചാനലുകൾ നമുക്ക് തരുന്ന വാർത്തകൾ സത്യമാണോ അല്ലയോ എന്ന് ആഴത്തിൽ പരിശോധിച്ച് ശരിയായ വാർത്തകൾ മാത്രം വിശ്വസിക്കാൻ കുറെ സമയവും ഊർജവും ചിലവാക്കുന്നത് കൊണ്ട്, നമ്മുടെ തലച്ചോർ പലപ്പോഴും, നമ്മുടെ വിശ്വാസങ്ങൾക്ക് അനുസരിച്ചുള്ള തെളിവുകൾ സ്വീകരിക്കുകയാണ് സാധാരണ ചെയ്യുക.

കാരണം ഊർജം ഏറ്റവും കുറച്ചു ചിലവഴിക്കാൻ വേണ്ടി ഡിസൈൻ ചെയത് ഒന്നാണ് നമ്മുടെ തലച്ചോർ. അതുകൊണ്ടാണ്, ഒരു ബാറ്റിനും ബോളിനും കൂടി 110 രൂപയും, ബാറ്റിനു ബോളിനേക്കാൾ നൂറു രൂപ കൂടുതലുമാണെങ്കിൽ ബാറ്റിനും ബോളിനും എത്ര രൂപ വിലയുണ്ടെന്ന് ചോദിക്കുമ്പോൾ ബാറ്റിനു നൂറും ബോളിനു പത്തുമെന്ന് നമ്മൾ ഉത്തരം പറയുന്നത്. (ഒറ്റനോട്ടത്തിൽ ശരിയാണെന്നു തോന്നാമെങ്കിലും ഈ ഉത്തരം തെറ്റാണ്.)

നമ്മുടെ ഓർമ്മകൾ പോലും പൂർണമായും ശരിയായ ഓർമകളല്ല, നമ്മൾ ഒരു വ്യക്തിയെ കുറിച്ചോ, ഒരു സംഭവത്തെ കുറിച്ചോ ഓർക്കുമ്പോൾ യാഥാർത്ഥത്തിൽ നമ്മൾ ഈ വ്യക്തിയെ കുറിച്ച് അല്ലെങ്കിൽ സംഭവത്തെ കുറിച്ച് അവസാനം ഓർത്ത ഓർമയെ ആണ് ഓർക്കുന്നത് (when you remember an event, you’re actually remembering the recollection from the last time you remembered it).

ഓർമിക്കുക എന്നത്, ഒരു വ്യക്തിയെയോ സംഭവത്തെയോ നമ്മുടെ മനസ്സിൽ പുനരാവിഷ്ക്കരിക്കുന്ന ഒരു പരിപാടിയാണ്. അവസാനം നമ്മുടെ ഓർമ ശരിയല്ലെങ്കിൽ, പിന്നീട് ആ ഓർമ്മകൾ ഒരിക്കലും ശരിയാകാത്ത ഒരു പ്രശ്നം ഉണ്ടാകും.

അതുകൊണ്ടാണ്, പലപ്പോഴും ഒരു സംഭവത്തിലെ ദൃക്‌സാക്ഷി വിവരങ്ങൾ, വളരെ പെട്ടെന്ന് രേഖപ്പെടുത്തി വച്ചില്ലെങ്കിൽ, പിന്നീട് ഒട്ടും പൊരുത്തമില്ലാത്ത വിവരങ്ങൾ പല സാക്ഷികളിൽ നിന്ന് ലഭിക്കുന്നത്.

നെഹ്‌റുവിനെ കുറിച്ച് അനേകം നുണക്കഥകൾ എഴുതിയുണ്ടാക്കി കഴിഞ്ഞാൽ, ഇനി വരുന്ന തലമുറയും നെഹ്‌റുവിനെ കുറിച്ചുള്ള ഓർമ്മകൾ സംഘപരിവാർ നിർമ്മിച്ചെടുത്ത ഓർമകളായിരിക്കും എന്ന് എനിക്കുറപ്പാണ്.

ഊർജം ലഭിക്കാൻ വേണ്ടി, വളരെയധികം ചിന്തിക്കാതെ, നമ്മുടെ തലച്ചോർ ഷോർട് കട്ടുകൾ എടുക്കുന്നത് കൊണ്ട്, നമ്മുടെ മനസ്സിൽ ആദ്യം തോന്നുന്ന കാര്യം തെറ്റാണെങ്കിൽ കൂടി വിശ്വസിക്കുന്ന സ്വഭാവക്കാർ സാധാരണ വലതുപക്ഷ ചിന്താഗതിക്കാരായിരിക്കും.

ഉദാഹരണത്തിന്, ജാതി സംവരണം ഒരു തൊഴിലിടത്തിലെ ഗുണനിലവാരം കുറക്കുമെന്നോ, കുടിയേറ്റം ഒരു രാജ്യത്തെ സമ്പദ്‌വ്യവസ്ഥയെ പിന്നോക്കം വലിക്കുമെന്നോ, ഒരു പ്രത്യേക മതത്തിൽ പെട്ടവർ കൂടുതൽ കുട്ടികളെ പ്രസവിക്കുമെന്നോ, മദ്യവും ലോട്ടറിയും ആണ് കേരളത്തിലെ പ്രധാന വരുമാന മാർഗമെന്നോ ഒക്കെ പറഞ്ഞാൽ പെട്ടെന്ന് വിശ്വസിക്കുന്നവരാണ് നമ്മൾ.

രണ്ടു കാര്യങ്ങൾ തമ്മിൽ പരസ്പര ബന്ധമുണ്ട് എന്നത്കൊണ്ട്, ഒന്ന് മറ്റൊന്നിന് കാരണമാകണം എന്നില്ല എന്നത് സ്റ്റാറ്റിസ്റ്റിക്സിലെ ഒരു അടിസ്ഥാന തത്വമാണ്.

സമയവും ഊർജവും എടുത്ത്, കാര്യങ്ങൾ കൂടുതൽ പഠിച്ച്, ശരിയായ ധാരണയിൽ എത്തുന്നത്, മനുഷ്യന്റെ സ്വാഭാവികമായ ഒരു പ്രവർത്തി അല്ല. വലതുപക്ഷ ചിന്താഗതിക്കാരനാകാൻ (ഞാൻ വലതുപക്ഷം എന്നതുകൊണ്ടുദ്ദേശിക്കുന്നത് നാട്ടിലെ സംഘപരിവാർ – ക്രി സംഘി സംഘടനകളെയും അവരുടെ അണികളെയും, അമേരിക്കയിലെ ട്രമ്പ് അനുകൂലികളെയുമാണ്) മനുഷ്യന് വലിയ അധ്വാനത്തിന്റെ ആവശ്യമില്ല എന്ന് ചുരുക്കം.

എന്നാൽ എന്തുകൊണ്ട് ഇടതുപക്ഷവും കോൺഗ്രസ്സും കേരളത്തിൽ ഇത്രനാൾ പിടിച്ചുനിന്നു എന്നതിന്റെ ഉത്തരം, നമ്മുടെ ലൈബ്രറി സമ്പ്രദായവും, പഴയ കാല ശാസ്ത്ര സാഹിത്യ പരിഷത്തും ( ഇപ്പോൾ ചില സാമൂഹിക വികസന കാര്യങ്ങളിൽ അവരുമായി അഭിപ്രയ വ്യത്യാസമുണ്ട്) , പാർട്ടി ക്ലാസുകളും ഒക്കെയാണ്.

ഓരോ കവലകളിലും നിന്ന് ലോക രാഷ്ട്രീയത്തെ കുറിച്ച് ആഴത്തിൽ സംസാരിക്കുന്ന രാഷ്ട്രീയക്കാർ നമുക്കുണ്ടായിരുന്ന ഒരു കാലമുണ്ടായിരുന്നു. നാലാം ക്ലാസ് വരെ പഠിച്ച എന്റെ ബാപ്പ തന്നെ പെരുമ്പടപ്പ് നിർമല ലൈബ്രറിയിലെ സ്ഥാപക അംഗങ്ങളിൽ ഒരാളാണ്. പുള്ളിയെ പോലെ ഈജിപ്തിലെ പ്രസിഡന്റ് അബ്ദുൽ നാസർ സൂയസ് കനാൽ പിടിച്ചെടുത്തതിന്റെ രാഷ്ട്രീയം മുതൽ, ആഫ്രിക്കൻ നാഷണൽ കോൺഗ്രസിന്റെ പ്രവർത്തങ്ങളെ കുറിച്ചുവരെ വാതോരാതെ സംസാരിക്കാൻ കഴിയുന്ന ചുമട്ടു തൊഴിലാളികൾ ഒരു കാലത്ത് കേരളത്തിൽ വലിയ അത്ഭുതം ഒന്നുമല്ലായിരുന്നു.

പക്ഷെ ആ ഒരു സംസ്കാരം നിലനിർത്തിപോരാൻ കേരളത്തിലെ ഇടത് രാഷ്ട്രീയ സംഘടനകൾക്കും കോൺഗ്രസിനും കഴിഞ്ഞോ എന്നത് സംശയാസ്പദമാണ്.

വാട്സാപ്പ് , ഫേസ്ബുക്, ഇൻസ്റ്റാഗ്രാം ഒക്കെ ഏറ്റവും നന്നായി ഉപയോഗിക്കുന്ന പാർട്ടി ബിജെപിയാണ്. സത്യമായാലും നുണയായാലും ഒരു കാര്യം വളരെ പെട്ടെന്ന് പരത്താനുള്ള സംഘടനാ ശേഷി ഇപ്പോൾ ഉള്ളത് ബിജെപിക്ക് മാത്രമാണ് (സ്വാതി ചതുർവേദിയുടെ I am a Troll: Inside the Secret World of the BJP’s Digital Army എന്ന പുസ്തകം ഇത് വിശദമായി പ്രതിപാദിക്കുന്നുണ്ട്).

അതിന് കുറച്ചെങ്കിലും പ്രതിരോധം തീർക്കുന്നത്, സുനിൽ മാഷിനെ പോലുള്ളവരുടെ പ്രഭാഷങ്ങളാണ്. കൊറോണകാലത്തെ വാർത്താസമ്മേളങ്ങൾ മുഖ്യമന്ത്രി ആഴ്ചയിൽ ഒന്ന് വീതമെങ്കിലുമായി വീണ്ടും തുടങ്ങിയിരുന്നെങ്കിൽ എന്ന് ചിന്തിക്കുന്ന ഒരാളാണ് ഞാൻ. പക്ഷെ വർഗീയ ശക്തികൾക്കെതിരെ കൂടുതൽ ആഴത്തിൽ ഓരോ വ്യക്തിയുടെയും അടുത്തെത്തുന്ന തരത്തിലുള്ള പ്രധിരോധം നമ്മളെ തീർക്കേണ്ടതുണ്ട്.

ഇപ്പോൾ ഡൽഹിയിൽ നടന്നത്, കേരളത്തിൽ നടക്കാതിരിക്കാൻ, സാധാരണക്കാരെ രാഷ്ട്രീയപരമായി നമ്മൾ ബോധവത്കരിക്കേണ്ടതുണ്ട്. രാഷ്ട്രീയം, സാമ്പത്തികശാസ്ത്രം, കേന്ദ്രവും സംസ്ഥാനങ്ങളും തമ്മിലുള്ള കൊടുക്കൽ വാങ്ങലുകൾ, അംബേദ്‌കർ, നെഹ്‌റു, സമൂഹത്തിൽ ജാതി നിശബദമായി പ്രവർത്തിക്കുന്നതെങ്ങിനെ തുടങ്ങിയ അനേകം വിഷയങ്ങൾ എളുപ്പം മനസിലാകുന്ന വിധത്തിൽ ആളുകളിലേക്ക് എത്തിക്കുകയും ചെയ്തിലെങ്കിൽ അനേക വർഷങ്ങൾ അതിനെ തിക്ത ഫലം നമ്മൾ അനുഭവിക്കേണ്ടി വരും.

എത്രയും പെട്ടെന്ന് തുടങ്ങാമോ, അത്രയും നല്ലത്.

Nazeer Hussain Kizhakkedathu

The post ഇന്ത്യൻ രാഷ്ട്രീയവും നുണ ഫാക്ട്റികളും appeared first on OPEN PRESS | ഓപ്പണ്‍ പ്രസ്സ്.

പിന്നീട് 1996 ൽ മഞ്ചേരി ആസ്ഥാനമായി പ്രവർത്തനം ആരംഭിച്ച പാലിയേറ്റീവ് സംവിധാനമാണ് ഇന്ത്യയിലെ തന്നെ ആദ്യ ജനകീയ പാലിയേറ്റീവ് കൂട്ടായിമ.

അവിടെ നിന്നും വളർച്ച ആരംഭിച്ച് കേരളത്തിലെ വിശിഷ്യാ ഉത്തര കേരളത്തിലെ ഓരോ പ്രദേശങ്ങളിലേക്കും പാലിയേറ്റീവ് കെയർ യൂണിറ്റുകൾ വ്യാപിച്ചു. ഓരോ മനുഷ്യനും ഇന്ന് ഒരു നിലക്കല്ലെങ്കിൽ മറ്റോരു നിലയിൽ പാലിയേറ്റീവ് കെയറിന്റെ ഭാഗമായി തീർന്നു.

ചികിത്സ അവസാനിച്ച് പ്രതീക്ഷയറ്റ് വീടുകളിലേക്ക് മടങ്ങുന്ന കാൻസർ രോഗികളിലായിരുന്നു ആദ്യ കാലത്ത് പാലിയേറ്റീവ് ശ്രദ്ധ കേന്ദ്രീകരിച്ചിരുന്നത്.

മരണം മുന്നിൽ കണ്ട് വീടകങ്ങളിൽ നീറി കഴിയുന്ന ഇത്തരം രോഗികളെ വീട്ടിൽ ചെന്നു പരിചരിച്ച് മരണം വരെയുള്ള ജീവിതം ആശ്വാസകരമാക്കുക, രോഗികളുടെ കുടുംബത്തിന് സാമ്പത്തികവും മാനസികവുമായ പിന്തുണ നൽകുക എന്നതായിരുന്നു മുഖ്യ ലക്ഷ്യം.

കാലത്തിനൊപ്പം നട്ടെല്ലിന് ക്ഷതം സംഭവിച്ചവർ, ഒരു ഭാഗം തളർന്നു പോയവർ, ജന്മനാ അരക്ക് കീഴെ തളർന്നവർ കിഡ്നി രോഗികൾ ഷുഗർ പ്രെഷർ തുടങ്ങിയ രോഗം മൂര്ധന്യാവസ്ഥയിൽ എത്തിചേർന്നവർ തുടങ്ങി മാനസിക രോഗികളിലേക്ക് വരെ പാലിയേറ്റീവിന്റെ സാന്ത്വനം കടന്നു ചെന്നു.

രോഗി പരിചരണത്തിന് വേണ്ടിയുള്ള ഈ ജനകീയ കൂട്ടായ്മയുടെ വിജയം അകമഴിഞ്ഞുള്ള വളണ്ടിയർമാരുടെ സേവനവും നാട്ടുകാരുടെ പരിപൂർണ പിന്തുണയും തന്നെയാണ്.

കോവിഡിനെ ഭയന്ന് ലോകം മുഴുവൻ വീടുകളിൽ ഒതുങ്ങിയപ്പോൾ പോലും വീടകങ്ങളിൽ തങ്ങളെയും പ്രതീക്ഷിച്ചു കഴിയുന്ന രോഗികളുടെ പ്രതീക്ഷ തെറ്റിക്കാതെ പാലിയേറ്റീവ് വളണ്ടിയർമാരും നേഴ്സ്മാരും കർമ നിരതരായിരുന്നു.

ഏതൊരു സംവിധാനത്തെയും പോലെ പാലിയേറ്റീവിന്റെയും നിലനിൽപ്പിന് വലിയ രീതിയിൽ തന്നെയുള്ള സാമ്പത്തികം ആവശ്യമാണ്. ജനുവരി 15 പാലിയേറ്റീവ് ദിനാചരണത്തിലൂടെയുള്ള ഫണ്ട് സമാഹരണവും വ്യക്തികൾ നൽകുന്ന മാസവരിയും കടകളിലും മറ്റും സ്ഥാപിച്ചിട്ടുള്ള കളക്ഷൻ ബോക്സുകളുമൊക്കെയാണ് പാലിയേറ്റീവ് സംവിധാനങ്ങളുടെ സാമ്പത്തിക സ്രോതസ്സ്.

ഇന്ന് ലോകം മുഴുക്കെ എന്ന പോലെ കോവിഡ് തീർത്ത പ്രതിസന്ധിയിൽ പാലിയേറ്റീവ് കെയർ സെന്ററുകളും സാമ്പത്തികമായി വലിയ പ്രയാസം നേരിടുകയാണ്. വരുമാനം ഗണ്യമായ രീതിയിൽ കുറഞ് പ്രവർത്തനങ്ങൾ സ്തംഭിച്ചു പോകുമോ എന്ന അവസ്ഥയിലാണ് പല പാലിയേറ്റീവ് യൂണിറ്റുകളും.

ഓരോ പാലിയേറ്റീവ് യൂണിറ്റുകളുടെയും പ്രതീക്ഷ ജനുവരി 15 നോടനുബന്ധിച്ചു നടക്കുന്ന വിഭവ സമാഹരണത്തിൽ ജനങ്ങൾ അകമഴിഞ്ഞു സഹകരിക്കുമെന്ന് തന്നെയാണ്.

ആരോഗ്യമുള്ള നമ്മൾ ഇത്രമേൽ പ്രയാസമനുഭവിക്കുന്നുവെങ്കിൽ രോഗം തിന്ന് തീർക്കുന്ന നമ്മുടെ കൂടെപ്പിറപ്പുകൾ എത്രമേൽ കഷ്ടപ്പെടുന്നുണ്ടാകുമെന്ന് നമുക്ക് ചിന്തിക്കാവുന്നതേയുള്ളൂ.

സാന്ത്വനത്തിന്റെ ഈ തൂവൽ സ്പര്ശങ്ങൾ നിലച്ചു പോകാതിരിക്കാൻ നമുക്ക് നമ്മുടെ നാടുകളിലെ പാലിയേറ്റീവ് കെയർ സെന്ററുകളെ നെഞ്ചോട് ചേർക്കാം.

The post ജനുവരി 15, പാലിയേറ്റീവ് ദിനം; നിലച്ചു പോകരുത് ഈ സാന്ത്വന സ്പർശം appeared first on OPEN PRESS | ഓപ്പണ്‍ പ്രസ്സ്.

ഇന്നും അമേരിക്കയാണ് ലോകത്തെ സാങ്കേതിക വളർച്ച ഏറ്റവും കൂടുതലുള്ള രാജ്യം. ഇന്റർനെറ്റ്‌, എല്ലാ സോഷ്യൽ മീഡിയയും നിർമ്മിത ബുദ്ധിയുമുൾപ്പെടെയുള്ള സാങ്കേതിക വളർച്ച അമേരിക്കയിൽ നിന്നാണ്. ലോകത്തെ മിക്കവാറും വൻ ടെക് കമ്പനികൾ എല്ലാം അമേരിക്കയിലാണ്. മൈക്രോ സോഫ്റ്റ്‌, ഗൂഗിൾ, മെറ്റ, ടെസ്ല, ഐ ബി എം, X അങ്ങനെ എല്ലാം.

ഇപ്പോൾ ചൊവ്വയിൽ പോയി ആവാസ വ്യവസ്ത പണിയാൻ തയ്യാറായി നിൽക്കുകയാണ് ഈലോൺ മസ്ക്.

പക്ഷേ, ലോകത്തു ഏറ്റവും സ്വാധീനമുള്ള ഹോളിവുഡ് ആസ്ഥാനമായ ലോസാഞ്ചൽസിനു അടുത്ത് അൽറ്റഡനയിൽ ജനുവരി 7 നു തുടങ്ങിയ തീ പിടുത്തത്തിൽ ഏതാണ്ട് 40, 000 വീടുകൾ നശിച്ചു. ഇത് വരെ 25 മരണം റിപ്പോർട്ട് ചെയ്തു. കാണതായ അനേകർ ഇപ്പോഴുമുണ്ട്. ഹോളിവുഡ് സെലിബ്രിറ്റികളുടെ കൊട്ടാര സമാന വീടുകൾ എല്ലാ കത്തിയമർന്നു. തീ ഇപ്പോഴും തുടരുന്നു.

ഒരു തലത്തിൽ സാങ്കേതിക വളർച്ച ആകാശം മുട്ടി സ്‌പേസിലേക്കു വളരുന്നു. നക്ഷത്രങ്ങളിൽ പോയി കൂടു കൂട്ടാൻ മനുഷ്യൻ തയ്യാറെടുക്കുന്നു. നിർമിതി ബുദ്ധി മുന്നോട്ടു കുതിക്കുന്നു. ഡ്രൈവർ ഇല്ലാതെ കാറുകൾ വരുന്നു. റോബോട്ടുകൾ.

പക്ഷേ മറ്റൊരു തലത്തിൽ മനുഷ്യന്റെ എല്ലാ അജ്ജയ്യതയും പൊളിച്ചു അടുക്കാൻ ഒരു കുഞ്ഞൻ വൈറസൊ, ഒരു തീപ്പൊരിയോ, ചുഴലികാറ്റൊ, വെള്ളപൊക്കമൊ, ഭൂകമ്പമൊ മതി.

മനുഷ്യ അവസ്ഥയുടെ വൈരുധ്യം ഏറ്റവും കൂടുതൽ വെളിവായതു കോവിഡ് മഹാമാരിയിൽ ആയിരുന്നു. ഭയപെട്ട മനുഷ്യൻ വീട്ടിൽ ലോക്‌ഡൌനായി പൂട്ടി കെട്ടി ഇരിക്കേണ്ടി വന്നു. ലോകമെങ്ങും യാത്ര ചെയ്യുന്ന മനുഷ്യന് അഞ്ചു കിലോ മീറ്റർ സഞ്ചരിക്കാൻ സാധിച്ചില്ല.

ഇത്രയൊക്കെ മെഡിക്കൽ സാങ്കേതിക വിദ്യ വളർന്നിട്ടും വിവിധ കണക്കുകൾ അനുസരിച്ചു ഏതാണ്ട് 70 ലക്ഷം മനുഷ്യരുടെ ജീവനാണ് ഒരു കുഞ്ഞൻ വൈറസ് കൊണ്ടു പോയത്. മെഡിക്കൽ ടെക്നോളേജിയും ഫാർമ കമ്പനികളും ഏറ്റവും വികാസം പ്രാപിച്ച അമേരിക്കയിൽ ഏതാണ്ട് 12 ലക്ഷമാളുകളുടെ ജീവനാണ് കോവിഡ് വൈറസ് കൊണ്ട് പോയത്

ആകാശത്തോളം ടെക്നോലെജിയും സയൻസ് ഒക്കെ വളർന്നെങ്കിലും “രാത്രിയിലെ ഭയത്തെയും പകൽ പറക്കുന്ന അസ്ത്രത്തെയും ഇരുട്ടിൽ സഞ്ചരിക്കുന്ന മഹാമാരിയെയും ഉച്ചെക്കു നശിപ്പിക്കുന്ന സംഹാരത്തെയും” മനുഷ്യനു ഇപ്പോഴും ഭയമാണ്.

കഴിഞ്ഞ 25 വർഷങ്ങളിൽ 13.5 ലക്ഷം പേരാണ് പ്രകൃതി ദുരന്തങ്ങളിൽ മരിച്ചതു. 2023 ൽ മാത്രം 86, 473 മനുഷ്യർ പ്രകൃതി ദുരന്തങ്ങളിൽ മരിച്ചു. ടർക്കി – സിറിയ ഭൂകമ്പത്തിൽ 60, 000 ആളുകൾ മരിച്ചു.

വിവിധ യുദ്ധങ്ങളിലും ആഭ്യന്തര യുദ്ധങ്ങളിലും കലഹങ്ങളിലുമായി ദശ ലക്ഷങ്ങൾ കൊല്ലപ്പെടുന്നു. അതിൽ നിരപരാധികളയ സാധാരണ മനുഷ്യർ കൊല്ലപ്പെടുന്നു

എല്ലാ സയൻസും സാങ്കേതിക വിദ്യയും വളർന്നിട്ടും പ്രകൃതി ദുരന്തങ്ങളുടെ മുന്നിൽ മനുഷ്യൻ പലപ്പോഴും നിസ്സഹയനാണു എന്നതാണ് മനുഷ്യാവസ്ഥയുടെ ഐറണി.

ജെ എസ് അടൂർ

The post പ്രകൃതി ദുരന്തങ്ങൾ; മനുഷ്യാവസ്‌ഥയുടെ ഐറണികൾ appeared first on OPEN PRESS | ഓപ്പണ്‍ പ്രസ്സ്.

പഠിക്കില്ല, കുട്ടികൾ അവനെ ക്ലാസിൽ ഒപ്പം കൂട്ടുന്നില്ല അടുത്തിടെയായി എന്നോട് തർക്കിക്കുകയും ദേഷ്യം വരുമ്പോൾ സാധനങ്ങൾ നശിപ്പിക്കുകയും എന്നെ അടിക്കുകയും ചെയ്യുന്നു, എന്നിങ്ങനെയായിരുന്നു അച്ചാമ്മയുടെ പരാതികൾ.

കുട്ടിയുടെ വിദ്യാഭ്യാസ-സാമൂഹിക-സാമ്പത്തിക മാനസിക സാഹചര്യം കൂടുതൽ മനസിലാക്കുന്നതിന് അച്ചാമ്മയുമായി കുടുതൽ വിശദമായ വിലയിരുത്തൽ നടത്തി. കുട്ടിയുടെ അമ്മയും അച്ഛനും എവിടെയെന്ന് ചോദിച്ചപ്പോഴാണ് കുടുംബത്തിൻ്റെ നിസ്സഹായ സാഹചര്യം കൂടുതൽ വെളിവായത്.

അച്ഛന് സ്ഥായിയായ മാനസികരോഗമാണ്. വളരെ വർഷങ്ങളായി മരുന്നു കഴിക്കുന്നു. ഇപ്പോൾ കുറച്ചു വർഷങ്ങളായി തിരുവനന്തപുരം ഊളമ്പാറയിലെ മാനസികാരോഗ്യ ആശുപത്രിയിൽ സ്ഥിരമായി അഡ്മിറ്റ് ചെയ്തിരിക്കയാണ്.

കുട്ടിയുടെ അമ്മ പത്താം ക്ലാസുവരെയെ പഠിച്ചിട്ടുള്ളൂ. അമ്മ വർഷങ്ങൾക്ക് മുൻപ് അമ്മയുടെ കസിനുമായി ഓടിപ്പോയി. ഇപ്പോൾ എവിടെയാണെന്ന് ആർക്കുമറിയില്ല. അവർക്ക് ഉണ്ടായിരുന്ന ഒരേ ഒരു കുട്ടിയാണ് നമ്മുടെ കഥാനായകൻ. ഇപ്പോൾ അച്ചാമ്മയാണ് കുട്ടിയുടെ ഏക ആശ്രയം. അച്ചാമ്മയുടെ ഭർത്താവ് മരിച്ചു പോയിട്ട് വർഷങ്ങളായി.

ചുരുക്കത്തിൽ അച്ചാമ്മക്ക് കൊച്ചുമോനും കൊച്ചുമോന് അച്ചാമ്മയും മാത്രം സ്വന്തം. കുരുഡൻ പൊണ്ടാട്ടിക്ക് ദൈവം തുണ എന്ന് പറഞ്ഞതുപോലെയാണ് കുട്ടിയുടെ അവസ്ഥ. ഒരു പുറമ്പോക്കിൽ താമസിക്കുന്നു. അച്ചാമ്മയുടെ ഏക വരുമാനം അവർക്ക് കിട്ടുന്ന വിധവാ പെൻഷനാണ്. ഇടക്കിടെ റേഷനും സൗജന്യമായി ലഭിക്കും. അങ്ങിനെ ജീവിക്കുന്നു.

ഇത്രയും കഷ്ടപ്പാടിലാണെങ്കിലും അച്ചാമ്മക്ക് നല്ല ആത്മവിശ്വാസമാണ്. ഞാൻ ഒരിക്കൽ വണ്ടിക്കൂലിക്കും ഭക്ഷണത്തിനും പൈസ ഉണ്ടോയെന്ന് ചോദിച്ചപ്പോൾ ഒരു സങ്കോചവും കൂടാതെ “ഉണ്ട്” എന്ന് അവർ പറഞ്ഞു. അതവിടെ നിൽക്കട്ടെ.

ബിഹേവിയറൽ പീഡിയാട്രിക്സിൽ കുട്ടിയെ കൂടുതൽ വിശകലനത്തിന് വിധേയമാക്കി. സംഭാഷണത്തിൽ കുട്ടി സാമാന്യമായി കാര്യങ്ങൾ പറയുന്നുണ്ട്. കുട്ടിയുടെ അച്ഛന് മാനസികരോഗമാണെന്നും ആശുപത്രിയിൽ അഡ്മിറ്റ് ചെയ്തിരിക്കയാണെന്നും അമ്മ മറ്റോരാളോടൊപ്പം പോയി എന്നും ഒക്കെ കുട്ടി പറഞ്ഞു. കൂട്ടുകാർ കളിക്കാൻ ഒപ്പം കൂട്ടുന്നില്ലയെന്ന് കുട്ടി എന്നോട് പരാതി പറഞ്ഞു.

കുട്ടിയുടെ വികാസ നിലവാരവും സ്വന്തം ദിനചര്യകൾ പരസഹായം കൂടാതെ പാലിക്കുന്നതിനുള്ള ശേഷിയും പഠനശേഷിയും ബുദ്ധി നിലവാരവും ഒക്കെ വിലയിരുത്തി. കുട്ടിയുടെ കുട്ടിക്കാലത്തെ വികാസ ശേഷിയുടെ പുരോഗതി അച്ചാമ്മക്ക് അറിയില്ല. ചെറിയ കുട്ടിക്കാലത്ത് അമ്മയായിരുന്നു അവനെ നോക്കിയത്. സ്വയം ദിനചര്യകൾ പാലിക്കുന്നതിനുള്ള ശേഷി പൂർണമായി ആർജിച്ചിട്ടില്ല. കുട്ടിക്ക് പഠനശേഷി കുറവാണ്. കുറച്ച് അക്ഷരങ്ങൾ അറിയാം. എന്നാൽ അക്ഷരങ്ങൾ ചേർത്ത് വാക്കുകൾ വായിക്കുന്നതിനോ വാചകങ്ങൾ വായിക്കുന്നതിനോ അറിയില്ല. കുറച്ച് അക്ഷരങ്ങൾ എഴുതുമെന്നല്ലാതെ കാര്യമായ എഴുത്തുശേഷിയും കുറവാണ്. കുട്ടിയുടെ ബുദ്ധിശേഷി വിലയിരുത്തി. കുട്ടിയുടെ ബുദ്ധിശേഷി 48 ആണ്. മിതമായ (moderate) ബുദ്ധി വൈകല്യം ഉള്ള കുട്ടി.

പ്രായത്തിനനുസൃതമായ നിലയിൽ ബുദ്ധി-വികാസ ശേഷികൾ ആർജിച്ചു വരാത്ത അവസ്ഥയെ ആണ് ബുദ്ധി വൈകല്യം എന്ന് വിശേഷിപ്പിക്കുന്നത്. അവർക്ക് സംസാരശേഷിയും കുറവായിരിക്കും. അവരുടെ ബുദ്ധിശേഷി 70 ന് ഉള്ളിൽ തന്നെ വ്യത്യസ്ഥ നിലവാരത്തിൽ ആയിരിക്കും. അവർക്ക് ആശയങ്ങൾ മനസിലാക്കുന്നതിനും അത് പറഞ്ഞ് ഫലിപ്പിക്കുന്നതിനുമുള്ള ശേഷി കുറവായിരിക്കും.

പൊതുവിൽ വിദ്യാഭ്യാസ മണ്ഡലത്തിൽ ബുദ്ധി വൈകല്യത്തിൻ്റെ തീവ്രത അനുസരിച്ച് അവരെ എജ്യൂക്കബിൾ, ട്രെയിനബിൾ, കസ്റ്റോഡിയൽ കെയർ എന്നിങ്ങനെ അവരെ മൂന്നായി തരം തിരിക്കാം. പൊതുവിൽ ബുദ്ധി വൈകല്യം IQ 50 ൽ താഴെ ഉള്ളവരെ കുടുംബ- സ്കൂൾ അന്തരീക്ഷത്തിൽ തന്നെ തിരിച്ചറിയും. അവർക്ക് ദിനചര്യകൾ നിവർത്തിക്കാനുള്ള ശേഷി കുറവായിരിക്കും.

ഇവിടെ കുട്ടിക്ക് മിതമായ ബുദ്ധിമാന്ദ്യമുണ്ട്. എന്നാൽ കുട്ടിയുടെ ബുദ്ധിമാന്ദ്യം മാതാപിതാക്കളോ സ്കൂളിൽ ടീച്ചറൊ കണ്ടെത്തിയില്ല. കുട്ടിയുടെ ദയനീയമായ കുടുംബ സാഹചര്യത്തിൽ ഇത് മാതാപിതാക്കൾ തിരിച്ചറിഞ്ഞില്ലെന്നത് മനസിലാക്കാം. എന്നാൽ കുട്ടി സ്കൂളിൽ 9 വർഷം പഠിച്ചിട്ട് ടീച്ചർമാർ ആരും അത് തിരിച്ചറിഞ്ഞില്ലെന്നത് വളരെ പരിതാപകരം.

സ്കൂളിൽ SSK അടക്കം എന്തെല്ലാം സംവിധാനങ്ങളുണ്ട്. എന്നിട്ടും ആരും അത് കണ്ടെത്തുകയോ കുട്ടിയെ കൂടുതൽ വ്യക്തിഗത വിശകലനത്തിനും വിലയിരുത്തലിനുമായി വിദഗ്ദ്ധരുടെ അടുത്തേക്ക് റെഫർ ചെയ്യുകയോ ചെയ്തില്ല. ഇപ്പോൾ അമ്മൂമ്മയുടെ മുൻകയ്യിലാണ് കുട്ടിയെ ബിഹേവിയറൽ പീഡിയാട്രിക്സിൽ കൊണ്ടുവന്നത്. ഇയിടെ ആയി കുട്ടി അച്ചാമ്മയോട് തർക്കിക്കുകയും പിടിവാശി കാണിക്കുകയും ചിലപ്പോൾ അച്ചാമ്മയെ ഉപദ്രവിക്കുകയും ചെയ്യാൻ തുടങ്ങിയതുകൊണ്ടാണ് അവർ കുട്ടിയെ ആശുപത്രിയിൽ കൊണ്ടുവന്നത്. അച്ഛൻ്റെ അസുഖം കൊച്ചുമോനും വരുമോയെന്ന ഭയമാണ് അച്ചാമ്മയെ ഇതിന് പ്രേരിപ്പിച്ചത്.

ഇവിടെ സാങ്കേതികമായി പറഞ്ഞാൽ കുട്ടി പരിശീലിപ്പിക്കാവുന്ന (Trainable) കാറ്റഗറിയിലാണ്. കുട്ടിയുടെ നിലവിലെ ബുദ്ധിശേഷിയുടെ അവസ്ഥയിൽ പഠിച്ച് അക്കാദമിക പഠനത്തിൻ്റെ ഗതിയിൽ മുന്നേറുന്നതിനുള്ള ശേഷി കുട്ടിക്കില്ല. എന്നാൽ വ്യക്തിഗത പിൻതുണ നൽകിയാൽ കുട്ടിക്ക് വായന, എഴുത്ത് എന്നിങ്ങനെ പ്രാഥമിക പഠനശേഷി ചെറിയ രീതിയിലെങ്കിലും ആർജിക്കാൻ കഴിഞ്ഞേക്കാം.

കുട്ടിക്ക് ബുദ്ധിശേഷി കുറവായതിനാൽ മറ്റ് കുട്ടികൾ പ്രതീക്ഷിക്കുന്ന രീതിയിൽ കൂടെ കളിക്കുന്നതിന് അവന് കഴിയില്ല. അതിനാലാണ് മറ്റ് സഹപാഠികൾ കുട്ടിയെ കളിക്കാൻ കൂടെ കൂട്ടാത്തത് എന്ന് മനസിലാക്കുക. കൗമാര പ്രായത്തിലെത്തിയതിൻ്റെ സ്വഭാവമാറ്റമാണ് കുട്ടി അച്ചാമ്മയുടെ നേരെ പ്രകടിപ്പിക്കുന്നത്. അതിൻ്റെ ഭാഗമാണ് കുട്ടിയിൽ ഇപ്പോൾ പ്രകടമായ ദേഷ്യവും അക്രമവും.

ബിഹേവിയറൽ പീഡിയാട്രിക്സിൽ കുട്ടിക്ക് വ്യക്തിഗത പഠന പരിശീലനം, ഡവലപ്മെൻ്റൽ തെറാപ്പി, ദിനചര്യ പരിശീലനം, ബിഹേവിയറൽ തെറാപ്പി എന്നിവ നൽകി. കുട്ടിക്ക് വീട്ടിൽ ദൈനം ദിനമായ കഥ വായന-വിമർശനാത്മക വിശകലനം നിർദ്ദേശിച്ചുവെങ്കിലും അത് ദൈനം ദിനം നടപ്പിലാക്കുന്നതിന് വീട്ടിലെ സാഹചര്യത്തിൽ കഴിയില്ല.

കാരണം കുട്ടിയുടെ ഏക ആശ്രയമായ അച്ചാമ്മക്ക് വായിക്കാനറിയില്ല. സ്കൂളിൽ ഇതൊക്കെ നടന്നിരുന്നുവെങ്കിൽ എത്രമാത്രം മഹത്തരമായേനെ നമ്മുടെ സ്കൂൾ വിദ്യാഭ്യാസ സമ്പ്രദായം. വിദ്യാഭ്യാസ മേഖലയിൽ ഇപ്പോൾ ഉണ്ടായിക്കൊണ്ടിരിക്കുന്ന പുരോഗതി ഒട്ടും കുറച്ചു കാണിച്ചു കൊണ്ടല്ല ഈ വിവരണമെന്ന് ഓർക്കുക.

എന്നാൽ വിദ്യാഭ്യാസത്തിൻ്റെ ഗുണനിലവാരത്തിലും ഇൻക്ലൂസീവ് വിദ്യാഭ്യാസത്തിലും നമ്മൾക്ക് ഇനിയും ഏറെ മുന്നോട്ട് പോകുവാനുണ്ട്. ഇത് സ്വയം വിമർശനപരമായി നമ്മൾ അംഗീകരിക്കുകയും അതിനനുസരിച്ച് ആസൂത്രണം നടത്തി നടപ്പിലാക്കുകയും വേണം.

ബുദ്ധിശേഷി വിലയിരുത്തി കുട്ടിയെ മെഡിക്കൽ കോളേജിലെ മെഡിക്കൽ ബോർഡിലേക്ക് അയച്ചു. കുട്ടിക്ക് ഡിസെബിലിറ്റി സർട്ടിഫിക്കറ്റ് കിട്ടി. അതിൻ്റെ അടിസ്ഥാനത്തിൽ കുട്ടിക്ക് പഞ്ചായത്തിൽ നിന്ന് വികലാംഗ പെൻഷൻ ലഭിക്കാൻ തുടങ്ങി. അങ്ങിനെ അവരുടെ മാസവരുമാനം 3200 രൂപ ആയി ഉയർന്നു. നല്ല കാര്യം.

പത്താം ക്ലാസിൽ സ്ക്രൈബിനെ ലഭിച്ചു. അങ്ങിനെ പത്താം ക്ലാസ് ജയിച്ചു. ഇപ്പോൾ വൊക്കേഷണൽ ഹയർ സെക്കണ്ടറി പ്ലസ് വണ്ണിന് പഠിക്കുന്നു. തെറാപ്പിക്ക് ഏകദേശം കൃത്യമായി രണ്ടു പേരും കൂടി വരും. ഇനി പ്ലസ്ടുവിനും സർട്ടിഫിക്കറ്റിൻ്റെ അടിസ്ഥാനത്തിൽ സ്ക്രൈബിനെ ലഭിക്കും. അങ്ങിനെ പ്ലസ്‌ ടുവും പാസാവും.

എന്നാൽ ഈ സർട്ടിഫിക്കറ്റ് കൊണ്ട് കുട്ടിക്ക് എന്തു പ്രയോജനം? ചിന്തിക്കുക.

ട്രെയിനബിൾ കാറ്റഗറിയിലായതിനാൽ കുട്ടിക്ക് തൊഴിൽപരമായ പുനരധിവാസം നൽകിയാൽ കുട്ടി നിലവിലെ സ്ഥിതിയിൽ നിന്ന് മെച്ചപ്പെടും. കുട്ടിയിൽ ഭിന്നശേഷി നിലവാരത്തിൽ എന്തെങ്കിലും പ്രത്യേക ശേഷികൾ കണ്ടെത്താൻ കാര്യമായി കഴിഞ്ഞില്ല.

കഴിഞ്ഞ ആറുമാസത്തിന് മുൻപുള്ള ആശുപത്രി സന്ദർശനത്തിൽ ഇതിനെക്കുറിച്ച് അച്ചാമ്മയും കുട്ടിയുമായി ചർച്ച ചെയ്തുകൊണ്ടിരിക്കെ കുട്ടി തൻ്റെ പരിമിതമായ സംസാരശേഷി കൊണ്ട് ഒരു ആഗ്രഹം അറിയിച്ചു. എനിക്ക് ഏതെങ്കിലും വർക് ഷോപ്പിലൊ കടയിലൊ നിൽക്കാൻ ഇഷ്ടമാണ്. എൻ്റെ ചില കൂട്ടുകാർ അങ്ങിനെ പോകുന്നുണ്ട്. എനിക്കും അങ്ങനെ പോകണമെന്നുണ്ട്. പക്ഷെ അച്ചാമ്മ സമ്മതിക്കുന്നില്ല.

ഇവിടെ കുട്ടി വലിയ ഒരു നിർദ്ദേശമാണ് വെച്ചതെന്ന് ഓർക്കുക. സ്കൂളിൽ പോയിക്കൊണ്ടിരിക്കെ അവധി ദിവസങ്ങളിൽ എവിടെയെങ്കിലും പോകാമെന്നാണ് കുട്ടി ഉദ്ദേശിച്ചത്. അച്ചാമ്മക്ക് കുട്ടിയുടെ ഈ താൽപ്പര്യത്തെ ഗൗരവമായി എടുക്കാൻ കഴിഞ്ഞില്ല. അവന് അതിന് കഴിയുമോയെന്ന് അച്ചാമ്മക്ക് വിശ്വാസമില്ല. അതാണ് കാരണം.

ഈ ചർച്ചക്കൊടുവിൽ കുട്ടി നിർദ്ദേശിച്ച മാതിരി ഏതെങ്കിലും വർക്ക് ഷോപ്പിലോ സമാനമായ കടകളോ കണ്ടെത്താൻ ഞാൻ അച്ചാമ്മയോട് നിർദ്ദേശിച്ചു. വലിയ ഒരു ജോലിയോ ശമ്പളമോ ഒന്നും ആവശ്യപ്പെടേണ്ട. വർക്ക് ഷോപ്പിലൊ സമാനമായ ഒരു കടയിലോ സഹായിയായി നിൽക്കാൻ അവസരം നോക്കിയാൽ മതി. ചായ വാങ്ങി വരിക, സാധനങ്ങൾ ഒരിടത്ത് നിന്ന് മറ്റൊരിടത്തേക്ക് മാറ്റിവെക്കുക, വണ്ടി തുടക്കുക എന്നിങ്ങനെ. കൂടുതൽ ശീലമാകുമ്പോൾ അടുത്ത ഘട്ടത്തിലുള്ള ജോലി നൽകുക. അങ്ങനെ തുടരുക.

പക്ഷെ മുൻ പരിചയവും സുരക്ഷിതത്വവും ഉള്ള ഒരിടമായിരിക്കണം. അവർ കുട്ടിയ്ക്ക് സംരക്ഷണം നൽകണം. കുട്ടിയോട് നിർദ്ദയമായി പെരുമാറുകയോ ഉപദ്രവിക്കുകയോ ചെയ്യാൻ പാടില്ല. ഇത് ഉറപ്പ് വരുത്തണം. ഇത് കേട്ടിരുന്ന കുട്ടിക്ക് വളരെ സന്തോഷമായി. അച്ചാമ്മ ഒടുവിൽ ഇത്തരത്തിൽ ശ്രമിക്കാമെന്ന് പറഞ്ഞു പോയി.

ഒരു മാസം കഴിഞ്ഞ് അടുത്ത സന്ദർശനത്തിന് കുട്ടിയും അച്ചാമ്മയും വന്നു. അച്ചാമ്മ ഒരു മോട്ടോർ വർക്ക് ഷോപ്പ് കണ്ടെത്തി. അയൽപക്കവീട്ടിൽ താമസിക്കുന്ന ഒരു ബസ് കണ്ടക്ടർ ആയ ഒരാളുവഴിയാണ് വർക്ക് ഷോപ്പ് കണ്ടെത്തിയത്. ഇപ്പോൾ അവധി ദിനങ്ങളിൽ കുട്ടി വർക്ക് ഷോപ്പിൽ പോകും.

കഴിഞ്ഞ ആറ് മാസമായി ഇത് വിജയകരമായി തുടരുന്നു. ചായ വാങ്ങി വരുന്ന ജോലിയാണ് കുട്ടി ഇപ്പോൾ വർക്ക് ഷോപ്പിൽ ചെയ്യുന്നത്. ഒപ്പം ചില സഹായിവേലകളും കുട്ടി ചെയ്യുന്നുണ്ട്. 15 പേർ ജോലിചെയ്യുന്ന വർക്ക് ഷോപ്പാണ്.

കുട്ടിക്ക് ഭക്ഷണവും നല്ല പരിഗണനയും ഒക്കെ അവിടെ നിന്ന് തന്നെ ലഭിക്കുന്നുണ്ട്. ഒപ്പം സ്കൂളിലും മുടങ്ങാതെ പോകുന്നുണ്ട്. അങ്ങിനെ എല്ലാം വിജയകരമായി പോകുന്നു. ബിഹേവിയർ പീഡിയാട്രിക്സിലും കൃത്യമായി അച്ചാമ്മയും കുട്ടിയും വരുന്നുണ്ട്. വ്യക്തിഗത പഠന പരിശീലനവും സ്വഭാവ പ്രശ്നത്തിന് ബിഹേവിയർ തെറാപ്പിയും നൽകുന്നുണ്ട്. ചിത്രവായന – അക്ഷര- വാക്ക് പരിശീലനമാണ് കുട്ടിക്ക് ഞങ്ങൾ നൽകിക്കൊണ്ടിരിക്കുന്നത്.

പ്ലസ് ടു സ്ക്രൈബിൻ്റെ സഹായത്തിൽ ജയിക്കും അപ്പോൾ കുട്ടിയെ ITI (മെക്കാനിക്ക്)ക്ക് വിടാൻ കഴിയുമോയെന്ന് പരിശോധിക്കാനാണ് ഭാവി പ്ലാൻ. അത് വിദ്യാഭ്യാസ പുനരധിവാസമായി മാറും.

ഇത് വളരെ വിജയകരമായ വിദ്യാഭ്യാസ-തൊഴിൽ പുനരധിവാസ ശ്രമത്തിൻ്റെ മാതൃകയാണ്. ഇത്തരത്തിൽ വ്യക്തിഗതമായ വിലയിരുത്തൽ നടത്താൻ ശ്രമിച്ചിരുന്നില്ലെങ്കിൽ കുട്ടിയുടെ ജീവിതം കഷ്ടമായിപ്പോയേനെയെന്ന് ചിന്തിക്കുക. അച്ചാമ്മയുടെ കാലത്തിന് ശേഷം കുട്ടി എങ്ങിനെ ജീവിക്കും?

എല്ലാ ഭിന്നശേഷിയുള്ള എല്ലാ കുട്ടികളെയും ഇത്തരത്തിൽ കണ്ടെത്തി വിദഗ്ദ്ധമായ വ്യക്തിഗത വിലയിരുത്തൽ നടത്തി അവർക്ക് വിദ്യാഭ്യാസ- തൊഴിൽ പുനരധിവാസം നടത്താൻ കഴിഞ്ഞിരുന്നെങ്കിൽ നമ്മുടെ ലോകം എത്രയോ മെച്ചപ്പെട്ടതാകുമായിരുന്നു. ചിന്തിക്കുക…!

അക്കാദമികമായി മുന്നേറാൻ കഴിയാത്ത ഭിന്നശേഷിയുള്ള എല്ലാ കുട്ടികളെയും ഇത്തരത്തിൽ വിദ്യാഭ്യാസ-തൊഴിൽ പുനരധിവാസത്തിന് അയക്കാൻ നമുക്ക് കഴിഞ്ഞാൽ അത് വലിയ വിദ്യാഭ്യാസ മുന്നേറ്റമാകും. അക്കാദമികമായി മുൻപന്തിയിൽ നിൽക്കുന്ന കുട്ടികൾക്ക് പ്രവേശനപ്പരീക്ഷക്ക് പരിശീലനം നൽകുന്ന അതേ മാനസിക ഭൗതിക തയ്യാറെടുപ്പ് തന്നെ ഇത്തരം കുട്ടികളുടെ കാര്യത്തിലും വിദ്യാഭ്യാസ സമ്പ്രദായം എടുക്കേണ്ടതുണ്ട്.

ഒടുവിൽ, ലോഹിതദാസിൻ്റെ തിരക്കഥയിലാണ് നമ്മൾക്ക് ഇത്തരത്തിൽ തികച്ചും സാധാരണ മനുഷ്യരെ കാണുന്നത്. ഇവിടെ വിവരിച്ചത് ലോഹിതദാസിൻ്റെ ഒരു തിരക്കഥയായിരുന്നുവെങ്കിൽ നമ്മൾ തികച്ചും സാങ്കല്പികമെന്ന് പറഞ്ഞ് തള്ളിയേനെ. എന്നാൽ ലോഹിതദാസിൻ്റെ തിരക്കഥയെ വെല്ലുന്ന മനുഷ്യരും ഇവിടെ ജീവിക്കുന്നുവെന്ന് നമ്മൾ അറിയുക.

Jayaprakash Raghavan

The post ഭിന്നശേഷി കുട്ടികൾ; വിദ്യാഭ്യാസ-തൊഴിൽ പുനരധിവാസ പദ്ധതികളാണ് വേണ്ടത് appeared first on OPEN PRESS | ഓപ്പണ്‍ പ്രസ്സ്.

ഞാൻ ഏതാണ്ട് മുപ്പതു വർഷങ്ങളായി യൂ കെ, യൂറോപ്പ്യൻ രാജ്യങ്ങളിൽ നിരന്തരം സഞ്ചരിക്കുകയും, പ്രവർത്തിക്കുകയും ഏതാണ്ട് അഞ്ചു വർഷത്തിൽ അധികം ജീവിക്കുകയും ചെയ്തയാളാണ്..

അതു മാത്രം അല്ല, ജോലിയുടെ ഭാഗമായി യൂറോപ്പിലെയും യൂ കെ യിലെയും പൊളിറ്റിക്കൽ ഇക്കോണമി ട്രാൻസിഷൻസ് പഠിക്കുകയും ചെയ്യുന്നയാളാണ്.

കഴിഞ്ഞ മൂന്നു ദിവസം മുമ്പ് ജർമനിയിലെ സർക്കാർ നിലം പതിച്ചത് കേരളത്തിലെ മാധ്യമങ്ങൾ അറിഞ്ഞു എന്നു പോലും തോന്നുന്നില്ല. യുറോപ്യൻ യൂണിയനിലെ ഏറ്റവും വലിയ ഇക്കോണമിയായ ജർമനിയും ഫ്രാൻസും രാഷ്ട്രീയ പ്രശ്നങ്ങളിലും അനശ്ചിതത്തിലേക്കും പോകുകയാണ്.

യൂ കെ യിലെ രാഷ്ട്രീയവും കുഴാമറിച്ചിൽ അതി ജീവിച്ചിട്ടില്ല.

മുപ്പതു വർഷം മുമ്പ് കണ്ട ആത്മ വിശ്വാസവും സാമ്പത്തിക വികസനവും ലോക മാർകെറ്റിൽ സ്വാധീനവുമുള്ള യൂറോപ്പല്ല ഇപ്പോൾ കാണുന്നത്.

മിക്കവാറും രാജ്യങ്ങളിൽ സ്റ്റാഗ്നേഷൻ എന്ന അവസ്ഥയാണ്. ജീവിത ചിലവുകൾ വർദ്ധിക്കുന്നു. അതേ സമയം ശമ്പളം അതിന് അനുസരിച്ചു വർധിക്കുന്നില്ല. അതു കൊണ്ടു ശരാശരി ആളുകളുടെ നെറ്റ് സേവിങ് കുറഞ്ഞു. ജോലിയുള്ളവർക്ക് തന്നെ കഷ്ടിച്ചു ജീവിക്കാമെന്ന അവസ്ഥയാണ്.

പൊതു കടവും സ്വകാര്യ കടവും കൂടി വരുന്നു. മൈഗ്രെഷൻ കൂടി വരുന്നത് തങ്ങളുടെ തൊഴിൽ അവസരങ്ങൾ കുറയ്ക്കുമെന്നു ഗണ്യമായ ഒരു വിഭാഗം ചിന്തിക്കുന്നു.

അസാമാനതകൾ വർധിക്കുന്നു. ഏജിങ് പോപ്പുലേഷൻസ്, ഫേർട്ടിലിറ്റി കുറയുന്നു. അതു കൊണ്ട് തന്നെ ഇക്കോനമിക് പ്രോഡക്റ്റിവിറ്റി കുറയുന്നു. മൈഗ്രൻഡ് ലേബർ ഫോഴ്‌സ് ആവശ്യം. എന്നാൽ മൈഗ്രെൻസിൽ ഭൂരിപക്ഷത്തിനും അവരുടെ വിദ്യാഭ്യാസതിന്നു അനുസരിച്ചുള്ള ജോലി കിട്ടുന്നില്ല. കിട്ടുന്ന ജോലികൾ കൊണ്ടു ടാക്സ് കൊടുത്തു കഷ്ടിച്ച് പിടിച്ചു നിൽക്കാം. ഇതൊക്കെയാണെങ്കിലും ആന്റി ഇമിഗ്രൻസ് രാഷ്ട്രീയക്കാരായ വലതു പക്ഷം വളരുന്നു.

പോസ്റ്റ്‌ കോവിഡ് സാമൂഹിക സാമ്പത്തിക അരക്ഷിതാവസ്ഥയിൽ തീവ്ര വലതു പക്ഷ മൈഗ്രെഷൻ വിരുദ്ധ രാഷ്ട്രീയവും മിക്കവാറും എല്ലാ യൂപ്യൻ രാജ്യങ്ങളിലും സജീവമാണ്.

തിരെഞ്ഞെടുപ്പിൽ മിക്കവാറും യൂറോപ്പ്യൻ രാജ്യങ്ങളിൽ വലതു പക്ഷ സർക്കാരാണ്. നേതർലാൻഡ്‌, സ്വീഡൻ പോലുള്ള രാജ്യങ്ങളിൽ പോലും വലതു പക്ഷമാണ്. ജർമനിയിലെ സോഷ്യൽ ഡെമോക്രാറ്റിക് സർക്കാർ അവിശ്വാസ പ്രമേയത്തിൽ വീണു. ഇനി ഫെബ്രുവരിയിൽ നടക്കുന്ന തെരഞ്ഞെടുപ്പിൽ വലതു പക്ഷ അലയിൻസിനാണ് സാധ്യത.

ഏഷ്യയിൽ മിക്കവാറും രാജ്യങ്ങളിൽ ഒക്ടോബർ – ഫെബ്രുവരിയാണ് ടൂറിസ്റ്റ് സീസൺ. ഏഷ്യയിലെ ഏറ്റവും വലിയ ടൂറിസ്റ്റ് ഡെസ്റ്റിനേഷൻ ആയ തായ്ലാൻഡിൽ ഇപ്പോൾ യൂറോപ്യൻ ടൂറിസ്റ്റുകളെ അധികം കാണുന്നില്ല.

ഒരു കാലത്തു എവിടെ നോക്കിയാലും യുറോപ്യൻ യാത്രക്കാർ ആയിരുന്നു. ഇപ്പോൾ മഷിയിട്ട് നോക്കിയാൽ ഒന്നോ രണ്ടോ അവിടെയും ഇവിടെയും കാണാം. കഴിഞ്ഞ മാസങ്ങളിൽ ശ്രീലങ്കയിൽ പോയിട്ടും അതേ അവസ്ഥ. കഴിഞ്ഞ ആഴ്ചയിൽ നേപ്പാളിലും യൂറോപ്പ്യൻ യാത്രക്കാർ അധികമില്ല. ഡൽഹിയിലും അവസ്ഥ അതു തന്നെ. ഞാൻ താമസിച്ചിരുന്ന ഹോട്ടൽ മാനേജ്മെന്റുകളും ഇത് തന്നെ പറഞ്ഞു.

യൂറോപ്പിൽ ഉള്ളവർ ഇപ്പോൾ കൂടുതലും പോകുന്നത് അവരുടെ രാജ്യത്തിനു അടുത്ത ഡെസ്റ്റിനേഷനിലാണ്. കാരണം രണ്ടാണ്. അവരുടെ നെറ്റ് സേവിങ് കുറഞ്ഞു. വിമാന കൂലി കൂടി. യൂറോപ്യൻ ഡെസ്റ്റിനേഷനിൽ മിക്കവാറും ബജറ്റ് എയർ ലൈൻ, ട്രെയിൻ, കാർ ഉപയോഗിച്ച് യാത്ര ചെയ്യാം. താമസത്തിന് എയർ ബി ൻ ബി ക്ക് ആദായ വാടാകക്ക് വീടുകൾ കിട്ടും. വിന്റർ സമയത്തു അവർ കൂടുതൽ പോകുന്നത് സ്പെയിൻ/ പോർച്ഗൽ തുടങ്ങിയ രാജ്യങ്ങളിലാണ്.

എന്റെ പല സുഹൃത്തുക്കളോടും ഏഷ്യയിൽ വരാത്തത് എന്താണ് എന്ന് ചോദിക്കുമ്പോൾ, “വെരി എക്സ്പൻസിവ്. വി കാൻ നോ ലോങ്ങർ അഫോഡ് ഇറ്റ് “ എന്ന ഉത്തരമാണ് കിട്ടുന്നത്.

പണ്ട് കൊളോണിയൽ വെൽത്തിൽ അഭിരമിച്ച പല രാജ്യങ്ങളും ഇപ്പോൾ സാമ്പത്തിക പ്രശ്നത്തിലാണ്. കഴിഞ്ഞ വർഷം യൂ കെ യേ കുറിച്ചു നടന്ന ഒരു സെമിനാറിൽ ഡിലാപ്പിലേറ്റെഡ് ഇക്കോണമി, പൊളിറ്റിക്സ് ആൻഡ് സോഷ്യൽ ഇൻഫ്രാസ്റ്റക്ച്ചർ എന്നാണ് ഞാൻ പറഞ്ഞത്.

കഴിഞ്ഞ വർഷം യു കെ യിൽ ആയിരുന്നപ്പോൾ റയിൽ മിന്നൽ പണിമുടക്ക് കൊണ്ടു ഞാൻ ഉൾപ്പെടെ ഉള്ള യാത്രക്കാർ വലഞ്ഞു. എയർപോർട്ടിൽ പലപ്പോഴും ഇമിഗ്രേഷൻ ക്ലിയറൻസിനു ഒരു മണിക്കൂർ ക്യൂ നിൽക്കണം. ഭക്ഷണ സാധാനങ്ങൾക്ക് വില കൂടി. എൻ എച് എസിൽ പലപ്പോഴും ഒരു അപ്പൊയ്മെന്റ് കിട്ടാൻ ആഴ്ച്ചകളും ചിലപ്പോൾ മാസങ്ങളും കാത്തിരിക്കുന്നു.

മുപ്പതു വർഷം മുമ്പ് പരീസിലേ സി ഡി ജി എയർപോർട്ട് കണ്ടു ഞാൻ അതിശയിച്ചിട്ടുണ്ട്. പക്ഷേ കഴിഞ്ഞ വർഷം അതു റൻ ഡൌൺ എയർപോർട്ട് ആയാണ് തോന്നിയത്. എലിയെയും പാറ്റായെയും കണ്ടു.

ഇന്ന് ലോകത്തിലെ മികച്ച എയർപോർട്ടും എയർ ലൈനുകളും ഏഷ്യയിലാണ്.

റഷ്യ – യുക്രൈൻ യുദ്ധം നീണ്ടു പോകുന്നു. ഇന്നത് രണ്ടു ചെരികളായി തിരിഞ്ഞുള്ള യുദ്ധമായി പരിണമിച്ചു. അതു പോലെ ഇസ്രായേൽ സാധാരണ ക്വിക്ക് ആൻഡ് ഡേർട്ടി വാറിനു പകരം പ്രോലോങ്ങ്ഡ് ആയ അഗ്രെസ്സിവ് യുദ്ധ മോഡിലാണ്. അതു ഇറാൻ, ലെബനോൻ, സിറിയ, പലസ്റ്റീൻ എല്ലാത്തിനെയും ബാധിക്കുന്ന അവസ്ഥയിൽ. സിറിയ ഇസ്ലാമിസ്റ്റ് രാഷ്ട്രീയ ശക്തികൾ പിടിച്ചു എടുത്തു.

യൂറോപ്യൻ എയ്ഡ് കുറഞ്ഞു. അതിൽ ഗണ്യമായ ഭാഗം ഉക്രൈൻ അഭയാർത്ഥികൾക്ക് ചിലവാക്കി സാധാരണക്കാർക്ക് സേവിങ് കുറഞ്ഞതീനാൽ ചാരിറ്റിക്ക് കൊടുക്കുന്നതും കുറഞ്ഞു.. പൊതുവേ ഫണ്ട് കുറഞ്ഞു. അതേ സമയം ചൈനീസ് ഫണ്ട് കൂടി.

ഇന്ത്യയിൽ നിന്നും സൗത് ഏഷ്യയിൽ നിന്നും ലക്ഷകണക്കിന് വിദ്യാർത്ഥികളാണ് യൂ കെ, യൂറോപ്പ്, കാനഡ, ഓസ്‌ട്രെലിയ എന്നിവടങ്ങളിൽ പോകുന്നത്. അതിന് ഒരു കാരണം വിദ്യാഭ്യാസ ബിസിനസ്.

ഈ രാജ്യങ്ങളിലേക്ക് ഏഷ്യയിൽ നിന്ന് കൊണ്ടു വരുന്ന പണമാണ്. അതു കാരണമാണ് എഡ്യുക്കേഷ ൻ ബിസിനസിന് അതാത് രാജ്യങ്ങളിലെ സർക്കാർ പിന്തുണ കൊടുക്കുന്നത്.

മിക്കവാറും പേര് ലോൺ എടുത്തു ഇവിടെ നിന്നും പൈസ അങ്ങോട്ട് ട്രാൻസ്ഫർ ചെയ്യുന്നതും അവിടെ പൈസ ചിലവാക്കി ജീവിക്കുന്നതും അവിടുത്തെ ക്ഷീണിച്ച ഇക്കൊണമിക്ക് അല്പം ആശ്വാസം നൽകും.

പക്ഷേ പഠിക്കാൻ പോകുന്ന പലർക്കും അതു കഴിഞ്ഞു കിട്ടുന്ന ജോലി ഇക്കോണമിയുടെ താഴെ തട്ടിലാണ്. ടാക്സും റെന്റുമൊക്കെ കൊടുത്തു കഴിഞ്ഞാൽ കഷ്ട്ടിച്ചു ജീവിക്കാം. പഠനം കഴിഞ്ഞു, അമ്പതിനായിരം യൂറോ / പൗണ്ടിൽ കൂടുതൽ വാർഷിക ശമ്പളം കിട്ടുന്നവർ ചുരുക്കം. ഒരുപാട് പേർക്ക് ജോലി കിട്ടുന്നില്ല.

യൂറോപ്പിൽ വലതു പക്ഷ രാഷ്ട്രീയത്തിന്റെ വളർച്ചക്ക് ഒരു കാരണം അവിടെയുള്ളവരിലുള്ള സാമൂഹിക സാമ്പത്തിക അരക്ഷിതാവസ്ഥ തന്നെ ( യൂ എസ്‌, ഇന്ത്യ, പലയിടത്തും അതു തന്നെ അവസ്ഥ ). അവിടെ എല്ലായിടത്തും ഇസ്ലോമോഫോബിയ മാത്രം അല്ല പൊതുവെ ആന്റി ഇമിഗ്രാന്റ് രാഷ്ട്രീയം കൂടുതൽ ശക്തമാകുകയാണ്.

ഇപ്പോൾ ലക്ഷകണക്കിന് സൗത് ഏഷ്യൻ രാജ്യങ്ങളിൽ നിന്ന് വിദ്യാഭ്യാസ റൂട്ട് വഴി മൈഗ്രെറ്റ് ചെയ്യുന്നവർക്കെതിരെ യുറോപ്പിലും യൂ കെ യിലുമൊക്കെ കാലാക്രമത്തിൽ രാഷ്ട്രീയ പ്രശ്നങ്ങൾ ഉണ്ടാകാം. കാരണം അവിടുത്തെ യുവാക്കൾക്ക് ജോലി കിട്ടാതെയാകുമ്പോൾ ആദ്യം തിരിയുന്നത് സൌത്ത് ഏഷ്യക്കാർക്കെതിരെയാകും.

ഇവിടുത്തെ അരക്ഷിതാവസ്ഥയിൽ നിന്ന് സ്വാതന്ത്ര്യം നേടി സുഖമായി ജീവിക്കാനാണ് പലരും മൈഗ്രെറ്റ് ചെയ്യുന്നത്. പക്ഷേ പലപ്പോഴും പട പേടിച്ചു പന്തളത്തു ചെന്നപ്പോൾ പന്തം കൊളുത്തി പട എന്ന അവസ്ഥയിലാണ് കാര്യങ്ങൾ. അതു പോലെ ഇക്കരെ നിൽകുമ്പോൾ ആക്കര പച്ച. അവിടെ ചെല്ലുമ്പോൾ ഇക്കരെ പച്ച.

എന്തായാലും മിന്നുന്നത് എല്ലാം പൊന്നല്ലന്ന അവസ്ഥയാണ് എല്ലായിടത്തും.

ജെ എസ് അടൂർ

The post യൂറോപ്പ്; മിന്നുന്നത് എല്ലാം പൊന്നല്ല! appeared first on OPEN PRESS | ഓപ്പണ്‍ പ്രസ്സ്.

മുസ്‌ലിം സമുദായത്തിൽ വർഗീയ ശക്തികൾ സ്വാധീനം ചെലുത്തുന്നു എന്നും മുസ്ലിം ലീഗ് അതിനു പാലമായി വർത്തിക്കുന്നു എന്നുമാണല്ലോ ചില കേന്ദ്രങ്ങൾ പ്രചരിപ്പിച്ചു കൊണ്ടിരിക്കുന്നത്.

ഏത് മാപിനി വെച്ച് പരിശോധിച്ചിട്ടും മുസ്‌ലിം സമുദായത്തിൽ ഇപ്പറയുന്ന സംഘടനകൾ ഉണ്ടാക്കിയ സ്വാധീനം കണ്ടെത്താൻ എനിക്ക് സാധിച്ചിട്ടില്ല. എന്റെ പിഴ എന്ന് കരുതി സമാധാനിക്കുക.

എന്ന് മാത്രമല്ല മുസ്‌ലിം സമുദായം വർഗീയ സംഘടനകൾക്ക് ചാരി നിന്ന അനുഭവവും ഇല്ല. അങ്ങനെ ചാരി നിന്നിരുന്നുവെങ്കിൽ അവർക്ക് എത്രയോ തദ്ദേശ സ്ഥാപനങ്ങൾ ഭരിക്കാമായിരുന്നു.

മുസ്‌ലിംകൾ കൂടുതൽ ഉള്ള വാർഡുകളിൽ മത്സരിച്ചിട്ടും തോറ്റു പോയതാണ് എസ് ഡി പി ഐ, വെൽഫയർ പാർട്ടികളുടെ അനുഭവം. മുസ്ലിം സമുദായത്തിന് അകത്തുനിന്ന് തന്നെയാണ് അവർ കൂടുതൽ എതിർപ്പുകൾ നേരിട്ടത്. ഇപ്പോഴും അതേ.

സിപിഎമ്മിന് ജമാഅത്തെ ഇസ്ലാമിയുമായി സംബന്ധമുണ്ടായിരുന്ന കാലത്തും സമുദായത്തിലെ മുഖ്യധാര അവർക്ക് എതിരായിരുന്നു. എസ് ഡി പി ഐയുടെ കാര്യത്തിലും അതാണവസ്ഥ.

എന്നിട്ടും മുസ്‌ലിം സമുദായത്തെ കുറിച്ചാണ് സി പി എം നേതാക്കൾക്ക് ആധി. സമുദായം ജമാഅത്തിന്റെയും എസ് ഡി പി ഐയുടെയും കെണിയിൽ വീണുപോകുമോ എന്ന് ആലോചിച്ച് അവർക്ക് ഉറക്കം നഷ്ടപ്പെട്ടിരിക്കുന്നു.

അതേസമയം മുസ്ലിമിതര സമുദായങ്ങളിലെ സ്ഥിതി എന്താണ്?

കാസ എന്ന പേരിൽ ഒരു കൊടുംവർഗീയ പ്രസ്ഥാനം ക്രൈസ്തവ സമൂഹത്തെ ആർ എസ് എസിന്റെ ആലയിൽ കെട്ടാൻ അച്ചാരം വാങ്ങി ഇറങ്ങിയിട്ട് കാലമൊത്തിരിയായി.

ചില വൈദികർ പോലും അവരുടെ കെണിയിൽ വീണിട്ടുണ്ട്. കടുത്ത മുസ്‌ലിം വിദ്വേഷം സാമൂഹിക മാധ്യമങ്ങളിലൂടെ കാസ പുറന്തള്ളുന്നുണ്ട്. ക്രൈസ്തവർ വർഗീയക്കുഴിയിൽ വീണുപോകുന്നതിൽ സിപിഎം നേതാക്കൾക്ക് പരിഭവമില്ലേ. അത് തടയണ്ടേ?

ക്രിസ്ത്യാനികളെ പ്രതിനിധീകരിക്കുന്ന കേരള കോൺഗ്രസുകൾ മിണ്ടിയിട്ടുണ്ടോ കാസക്കെതിരെ? ക്രൈസ്തവരിൽ ചെറു ന്യൂനപക്ഷം വർഗീയവത്കരിക്കപ്പെടുമ്പോൾ കയ്യും കെട്ടി നിൽക്കുന്ന ജോസ് കെ മാണിയും പി ജെ ജോസഫും വിമർശിക്കപ്പെടണ്ടേ?

സാദിഖലി തങ്ങൾക്കെതിരെ നടത്തിയത് പോലെ ഒരു ‘രാഷ്ട്രീയ വിമർശനം‘ കേരള കോൺഗ്രസ്‌ നേതാക്കൾക്കെതിരെ നടത്താൻ മുഖ്യമന്ത്രി ധൈര്യം കാട്ടുമോ?

ആർ എസ് എസിന്റെ ആശയപരമായ സ്വാധീനം ഇല്ലാത്ത ഏത് പാർട്ടിയുണ്ട് ഇന്ത്യയിൽ? കേരളത്തിൽ? സിപിഎമ്മിൽ പോലുമില്ലെ ഈ സ്വാധീനം? ഹിന്ദു സമുദായത്തിലേക്ക് ആർ എസ് എസ് കടന്നു കയറുന്നതിൽ ആർക്കും വേവലാതിയില്ല.

മുമ്പ് ബിജെപിക്ക്‌ ബാലി കേറാ മല ആയിരുന്ന ചില മണ്ഡലങ്ങളിൽ ഇക്കഴിഞ്ഞ ലോകസഭാ തിരഞ്ഞെടുപ്പിൽ ബി ജെ പി ഒന്നാം സ്ഥാനത്ത് വന്നതിൽ ആരും വ്യാകുലപ്പെടുന്നില്ല. എസ് ഡി പി ഐക്കോ വെൽഫയർ പാർട്ടിക്കോ അഞ്ഞൂറ് വോട്ട് തികച്ചും നൽകാത്ത മുസ്ലിം സമുദായത്തെ വർഗീയതയിൽ നിന്ന് രക്ഷിക്കാൻ സിപിഎം നടത്തുന്ന എഫർട്ടിന്റെ പത്തിലൊന്ന് മറ്റു സമുദായങ്ങളിൽ ബിജെപി / ആർഎസ്എസ് വേരാഴ്ത്തുന്നതിനെതിരെയും ഉണ്ടായിരുന്നെങ്കിൽ എന്ന് ആത്മാർഥമായും ആഗ്രഹിച്ചു പോകുന്നു.

മുസ്ലിംകൾ മാത്രം നന്നായി കണ്ടാൽ മതിയെന്ന സ്വാർത്ഥത സിപിഎമ്മിനെ പോലെ ഒരു കറകളഞ്ഞ മതേതര പാർട്ടിക്ക്‌ ഉണ്ടായിക്കൂടാത്തതാണ്.

അത് പോലെ ഡോ. പി സരിൻ അപ്പറഞ്ഞത് എനിക്ക് മനസിലായിട്ടില്ല. പാലക്കാട് നിയമസഭാ മണ്ഡലത്തിലെ മുസ്‌ലിം വോട്ടർമാരിൽ പകുതി പേരെയും എസ് ഡി പി ഐക്ക് പർച്ചേസ് ചെയ്യാൻ കഴിയുമെന്ന് പി സരിൻ പറഞ്ഞത് എന്തടിസ്ഥാനത്തിലാണെന്ന് എനിക്ക് ശരിക്കും മനസ്സിലായിട്ടില്ല.

അദ്ദേഹം എന്താണ് മുസ്‌ലിംകളെ കുറിച്ച് മനസിലാക്കി വെച്ചത്?

എസ് ഡി പി ഐ പറഞ്ഞിടത്ത് നിൽക്കുന്നവരാണ് പാലക്കാട്ടെ മുസ്‌ലിം വോട്ടർമാർ എന്നോ? പാലക്കാട് നിയമസഭാ മണ്ഡലത്തിൽ എസ് ഡി പി ഐ തനിച്ച് മത്സരിച്ചാൽ ആയിരം വോട്ടിന്റെ മുകളിൽ പോകില്ല.

2019 ൽ ലോക്‌സഭയിലേക്ക് എസ് ഡി പി ഐ യുടെ മുതിർന്ന നേതാവ് തുളസീധരൻ പള്ളിക്കൽ മത്സരിച്ചിട്ട് ആകെ കിട്ടിയത് 5,749 വോട്ടാണ്. ആകെ പോൾ ചെയ്യപ്പെട്ട വോട്ടിന്റെ 0.56%. ഓർക്കണം, ലോകസഭ തിരഞ്ഞെടുപ്പിൽ അവർ നേടിയ വോട്ടാണിത്.

അന്ന് പാലക്കാട് നിയമസഭാ മണ്ഡലത്തിൽ എസ് ഡി പി ഐ ചിഹ്നത്തിൽ ആകെ വീണ വോട്ടിന്റെ എണ്ണം അറിയണ്ടേ; 560. സംസ്ഥാന നേതാവിനെ കൊണ്ടുവന്നു മത്സരിപ്പിക്കുകയും കാടിളക്കി പ്രചാരണം നടത്തുകയും ചെയ്തിട്ട് എസ് ഡി പി ഐക്ക് അവിടെ കിട്ടിയ വോട്ടാണ് 560.

എന്നിട്ടാണ് സരിൻ പറയുന്നത് പാലക്കാട് നിയമസഭാ മണ്ഡലത്തിൽ എസ് ഡി പി ഐക്ക് ആറായിരം കേഡർ വോട്ടുണ്ടെന്നും അവർ പറഞ്ഞിടത്ത് വോട്ട് ചെയ്യുന്ന വേറെ എട്ടായിരം വോട്ടർമാർ ഉണ്ടെന്നും.

ഒരു ഈർക്കിൽ പാർട്ടിയെ ഇങ്ങനെ വലുതാക്കണോ എന്നത് വിടുന്നു. പക്ഷേ പാലക്കാട് നിയമസഭാ മണ്ഡലത്തിലെ മുസ്ലിം വോട്ടർമാരിൽ 40 ശതമാനം പേരും അവർ പറയുന്നിടത്ത് വോട്ട് ചെയ്യുന്നവരാണ് എന്നൊക്കെ പറയുമ്പോൾ എന്താണ് മുസ്‌ലിംകളെ കുറിച്ച് സരിൻ മനസിലാക്കി വെച്ചത്?

എസ് ഡി പി ഐയുടെ ആദിമ രൂപം എൻ ഡി എഫ് ആണ്. കോഴിക്കോട് ജില്ലയിൽ അത് പിറവി കൊണ്ട കാലം മുതൽ അതിനെതിരെ സമുദായത്തെ ബോധവത്കരിച്ചവരാണ് കേരളത്തിലെ മുസ്‌ലിം സംഘടനകളും പണ്ഡിത നേതൃത്വവും. താങ്കൾ ആ ചരിത്രം പഠിക്കണം. .

ഡോ. സരിൻ, തോറ്റൊരാളുടെ ഇന്നേരത്തെ മനോനില എനിക്ക് ഉൾകൊള്ളാൻ കഴിയും. പക്ഷേ താങ്കൾ പറഞ്ഞ വിവരക്കേട് അംഗീകരിച്ചു തരാൻ മനസ്സ് വരുന്നില്ല. അതുകൊണ്ടാണ് ഈ കുറിപ്പ്. അല്ലാതെ പരാജയത്തിൽ ആകെ തകർന്നിരിക്കുന്ന താങ്കളെ കൂടുതൽ വേദനിപ്പിക്കാനല്ല. താങ്കൾ നന്നായി വിശ്രമിക്കൂ. വേഗം പൂർവസ്ഥിതി പ്രാപിക്കാൻ താങ്കൾക്ക് കഴിയട്ടേ, പൊതുജീവിതം ഉഷാറായി മുന്നോട്ടുകൊണ്ടുപോകാൻ സാധിക്കട്ടേ.

മുഹമ്മദലി കിനാലൂർ

The post പാലക്കാട് തിരഞ്ഞെടുപ്പും സിപിഐഎം വർഗീയ പ്രചാരണങ്ങളും appeared first on OPEN PRESS | ഓപ്പണ്‍ പ്രസ്സ്.