കോവിഡ്; ട്രയിനിൽ നിർത്തിവെച്ചിരുന്ന സൗകര്യങ്ങള്‍ റെയിൽവേ പുനഃസ്ഥാപിച്ചു
ട്രെയിന്‍ യാത്രക്കാർക്ക് വലിയ ആശ്വാസം നൽകുന്ന വാര്‍ത്തയുമായി ഇന്ത്യന്‍ റെയില്‍വേ. കൊറോണ വ്യാപനം മൂലം ഏറെ കാലമായി നിര്‍ത്തിവച്ചിരുന്ന ചില പ്രധാന സൗകര്യങ്ങള്‍ റെയില്‍വേ വീണ്ടും പുനഃസ്ഥാപിച്ചു.
കൊറോണ കാലത്ത് നിര്‍ത്തിവച്ചിരുന്ന യാത്രാ സൗകര്യങ്ങളാണ് ഇന്ത്യൻ റെയിൽവേ പുനഃസ്ഥാപിച്ചിരിയ്ക്കുന്നത്. അതായത്, AC കോച്ചുകളില്‍ ഇനി മുതല്‍ യാത്രക്കാർക്ക് പുതപ്പുകൾ, ഷീറ്റ് തലയിണകൾ (ബെഡ്‌റോൾ) മുതലായവ വീണ്ടും ലഭിച്ചു തുടങ്ങും. ഇത് സംബന്ധിച്ച ഉത്തരവ് ഇന്ത്യന്‍ റെയിൽവേ പുറപ്പെടുവിച്ചു.
ഇന്ത്യൻ റെയിൽവേ ബോർഡ് എല്ലാ റെയിൽവേ സോണുകളുടെയും ജനറൽ മാനേജർമാർക്ക് ഇത് സംബന്ധിച്ച ഉത്തരവ് നല്‍കുകയും ഈ സേവനങ്ങള്‍ നല്‍കുന്നത് ഉടന്‍ പുനരാരംഭിക്കണമെന്ന് നിര്‍ദ്ദേശിക്കുകയും ചെയ്തു. ഇനി മുതല്‍ സീൽ ചെയ്ത കവറിലായിരിയ്ക്കും തലയിണകൾ, പുതപ്പുകൾ, ഷീറ്റുകൾ, ടവലുകൾ എന്നിവ ലഭിക്കുക എന്നും റെയിൽവേ അറിയിച്ചു.
എല്ലാ ട്രെയിനുകളുടെയും എയർ കണ്ടീഷൻ ചെയ്ത കോച്ചുകളിൽ തലയിണകൾ, പുതപ്പുകൾ, ഷീറ്റുകൾ, ടവലുകൾ നല്‍കുന്നത് റെയിൽവേ 2020 മെയ് മാസത്തിലാണ് നിര്‍ത്തിവച്ചത്. കൊറോണ വ്യാപനം മൂലമായിരുന്നു ഇത്. തുടര്‍ന്ന്, ദീർഘദൂര യാത്രകള്‍ക്ക് യാത്രക്കാർ സ്വന്തം പുതപ്പുകളും ബെഡ്ഷീറ്റുകളും കൊണ്ടുവരാൻ റെയില്‍വേ നിർദേശിക്കുകയായിരുന്നു.
എന്നാല്‍, റെയില്‍വേയുടെ ഈ പ്രഖ്യാപനത്തോടെ ദീര്‍ഘദൂര യാത്രക്കാര്‍ക്ക് ഏറെ ആശ്വാസം ലഭിക്കും. കാരണം, യാത്രയില്‍ പുതപ്പും ബെഡ്ഷീറ്റും ലഭിക്കാത്തതിനാൽ ജനങ്ങൾ ഏറെ ബുദ്ധിമുട്ട് അനുഭവിച്ചിരുന്നു. ഇത്തരം സാധനങ്ങളുമായി യാത്ര ചെയ്യുക, വര്‍ദ്ധിച്ച ലഗേജ് ദീര്‍ഘ ദൂര യാത്രക്കാരെ സംബന്ധിച്ചിടത്തോളം എളുപ്പമുള്ള കാര്യമായിരുന്നില്ല.
ഘട്ടം ഘട്ടമായാണ് റെയില്‍വേ സേവനങ്ങള്‍ പുന:സ്ഥാപിക്കുന്നത്. നേരത്തെ ഭക്ഷണം ഉൾപ്പെടെയുള്ള സൗകര്യങ്ങൾ പുനരാരംഭിച്ചിരുന്നു, ഇനി ഈ സൗകര്യങ്ങൾകൂടി വീണ്ടും യാത്രക്കാർക്ക് ലഭ്യമാക്കും.
The views and opinions expressed in this article are those of the authors and do not necessarily reflect the official policy or position of OPENPRESS
